Iti panangyebkasna ti "sakit ti nakemna" iti agdama nga administrasion, impeksa ni Bise Presidente Sara Duterte ti marikriknana nga "inusar" isuna ti bunggoy ti Marcos tapno mangabak ni Presidente Ferdinand Marcos Jr. iti 2022 presidential elections.
Iti pannakiuman kenkuana ti media idi Okt. 18, imbutaktakna no apay a nangabak ti UniTeam a nagkaduaanda ken Marcos.
Kinuna ni Duterte a talaga nga awan idi ti planona nga agkandidato a para bise presidente ngem kinombinsir isuna ni Senador Imee Marcos, kabsat ti Presidente, a tumaray a kadua ni Marcos tapno masigurado a maalada ti botos dagiti Bisaya (taga-Visayas Region).
Segun ken ni Duterte, immawag kenkuana ni Sen. Imee Marcos ket kiniddaw daytoy a tumaray isuna a bise presidente. Idi damagenna no apay, kinuna kano ni Sen. Marcos nga "abakennakami ni Leni" no di maala ni Duterte ti botos dagiti Bisaya para iti kabsat daytoy. Ni Leni Robredo ti kinalaban ni Marcos iti kinapresidente.
Kiddaw ni Quiboloy a Medical Furlough, inanamongan ti Pasig RTC
Kinuna ni Duterte nga insingasingna a da Sen. Bato dela Rosa ken Sen. Manny Pacquiao ti maki-partner ken ni Marcos, ngem nagkedked dagitoy.
Imbatad ni Duterte a nangisayangkat pay ti bunggoy ti Marcos iti maysa a quick survey tapno maipakita nga isuda ken Marcos ti posible a mangabak iti eleksion no agkaduada.
"Nausar? Wen. Nalawag met a kasta... Siempre, inusardak tapno mangabakda," kinuna ni Duterte. (Joseph Pedrajas/MANILA BULLETIN)
