Impalgak ni Bise Presidente Sara Duterte itay Oktubre 18 a pinakdaaranna ni Senador Imee Marcos, a kalienna ti tanem ni dati a presidente Ferdinand Marcos Sr. ket ibellengna ti bangkay daytoy iti West Philippine Sea.
Naisao daytoy ni Duterte iti maysa nga interbiu idi nasaludsod no ania ti makunana iti panangipalubos ni dati a presidente Rodrigo Duterte a maitanem ni Marcos Sr. iti Libingan ng mga Bayani.
Segun ken ni Duterte, imbagana ken ni Senador Imee a no dida agsardeng (a mangkalaban kenkuana), kalienna ti bangkay ni Marcos Sr. sa ibellengna iti WPS.
Idi Agosto 2016, imbilin ni dati a presidente Duterte ti pannakaitanem ni Marcos Sr. iti Libingan ng mga Bayani, a kinanunongan ti Korte Suprema kalpasan a sinupiat dagiti aktibista daytoy. Sakbayna, nabayag a nakamassayag ti bangkay iti mausuleo daytoy idiay Batac, Ilocos Norte. (Joseph Pedrajas/Manila Bulletin//Lito Hilidon/Bannawag)
