Impeksa ni Senate Minority Leader Aquilino Pimentel III ita a Lunes, Okt. 21 ti pammatina a kasapulan ni Vice President Sara Duterte ti propesional a tulong (agpakita iti doktor) mainaig kadagiti insawang daytoy itay nabiit kontra ken ni Presidente Ferdinand Marcos, Jr.
Iti maysa a pannakiuman iti media iti Senado, kinuna ni Pimentel a saan a gagangay dagiti sinasao ti maikadua a kangatuan a lider ti pagilian nangruna idi imbatad daytoy a pampanunotenna a pugotanna ti ulo ni Marcos ta nagbalin kanon a "toxic" wenno saanen a naannayas ti relasionna iti Presidente.
"Kinapudnona, madanaganak para kenkuana," kinuna ni Pimentel, "isu a panagkunak, kasapulanna ti agpakonsulta iti propesional wenno iti nasinged a gagayyem ken pamiliana tapno mairuar dagiti rikriknaen ken dagiti pampanunotenna. Narigat no saan a mairuar dagitoy."
Innayon pay ni Pimentel nga agduadua idi damo idi mangngegna ti ibagbaga ni Duterte a kalien kano daytoy ti bangkay ni dati a presidente Presidente Ferdinand Marcos Sr. iti Libingan ng mga Bayani sana ibelleng iti West Philippine Sea.
Kampo ni Duterte, agkiddaw iti legal aid ti ICC
“Idi nangngegko daydiay, nakigtotak. Impagarupko no artificial intelligence kadi daytoy (agsasao)? Ngem saan. Isuna a talaga," kinuna pay ni Pimentel. “Isu a saan a talaga a gagangay dagiti imbagbaga ni Vice President Sara Duterte ket para kaniak, karkarna a mapanunotna dagidiay, sa insaona pay a mismo."
Kinuna ni Pimentel a namnamaenna met nga adda agpaay a mangibaet iti Presidente ken Bise Presidente tapno makapagkappia dagitoy. (Hannah L. Torregoza/MANILA BULLETIN)
