PIMMUSAY ni Pacita Cabulera Saludes, mannurat ti Bannawag a tubo ti Badoc, Ilocos Norte, iti edadna a 94, itay Oktubre 23, 2024, iti pagtaenganda iti Honolulu, Hawaii.
Am-ammo ni Mrs. Saludes (Manang Pacing kadagiti nauubbing a mannurat) a kas nangbangon iti GUMIL Abra (Gunglo Dagiti Mannurat iti Abra) ken GUMIL Hawaii (Gunglo Dagiti Mannurat iti Hawaii) ken iti Annak ti Kailokuan iti America (AKA).
Maysa a maestra (nangisuro iti Divine Word College, Bangued, Abra, a nagturposanna, sa iti Abra College) sakbay a nagpa-Hawaii idi 1970.
Iti Hawaii, malaksid iti pannakakumikomna kadagiti aktibidad ti GUMIL Hawaii ken AKA, insamsamirana ti nagpaay nga announcer iti KISA radio station babaen ti programana a “Gumiliana Show.” Aktibo pay kadagiti nadumaduma a gunglo a pakairamanan ti Badoc-Pinili Association, IN Aid Association, Oahu Filipino Community Council, ken Timpuyog USA, Inc.
ALLON TI BIAG: Walo A Dekada A Panagdaliasat (32)
Nagsursurat kadagiti sarita, daniw, ken kolum iti Bannawag, nagpaay pay a kolumnista iti nadumaduma a pagiwarnak iti Hawaii, kas iti “Dayasadas” iti Pacific Courier, ken “Potahe” iti Hawaii-Filipino News. Nagpaay pay nga associate editor ti Pacific Courier ken ti Paradise Magazine.
Saan laeng a nagsursurat iti drama no di pay ket indirihena ti pannakayentablado dagiti adu a drama a dagiti kameng ti GUMIL Hawaii ti nagakem. Mairaman kadagiti sinuratna a drama a para iti entablado dagitoy: ”Biktima a Natan-ok,” ”Gapu Ta Patpatgenka,” ”Agtangkayagen ti Init,” ”Komedya Ilokana,” ken ”Anaraar iti Likud ti Sipnget.”
Mairaman met kadagiti libro nga impablaak ti GUMIL Hawaii idi panawenna: Dagiti Pagwadan a Filipino iti Hawaii (1974), Dandaniw: Iloko ken English (1975), Idi Kalman ken Ita (1978), GUMIL Hawaii ’79: Agtangkayagen (1977), Bullalayaw (1978), Utek ni Kayumanggi: Putar Dagiti Ilokano (1980), GUMIL Hawaii iti Sangapulo a Tawen (1981), Bin-i (1984), ken Dawa (1989). Isu pay ti editor ti Tapok, libro nga impablaak ti Badoc-Pinili Association.
Kaingungotna ni Fred Saludes ti Sinait, Ilocos Sur. Naaddaanda iti annak nga innem a babbai ken tallo a lallaki. (CBR)
