CAMP FLORENDO, La Union – Mangideploy ti Police Regional Office-1 iti 3,461 a polis tapno mapagtalinaed ti urnos ken talna iti rehion ti Ilokos a buklen dagiti probinsia ti Ilocos Norte, Ilocos Sur, La Union, ken Pangasinan, para iti Aldaw Dagiti Santo ken Aldaw Dagiti Kararua.
Kuna ni Police Brig. Gen. Lou F. Evangelista, hepe ti polisia ti Rehion 1, a mapan a 2,039 polis ti maideploy kadagiti 393 kamposanto, memorial park, ken kolumbaria, 259 a parke, resort, ken tourist destination, 349 kadagiti commercial area, 562 kadagiti nailian a highway ken kangrunaan a kalsada, 42 kadagiti matartarimaan a kalsada, 53 kadagiti eropueto, 157 kadagiti terminal ti bus iti babaen ti Ligtas Undas 2024.
Ilocos Sur, Umuna a Puesto iti Regional SubayBAYANI Awards
Innayon ni Evangelista a panggep ti Ligtas Undas 2024 a mangipaay iti madadaan a sungbat kadagiti posible nga insidente.
Dinawat ti PRO-1 ti tulong ti 567 a polis manipud kadagiti sabsabali a yunit ken nakiasmang kadagiti 1,711 nga advocacy group. Karaman dagiti katinnulong kadagiti komunidad, napateg ti akem dagitoy iti panangkontrol kadagiti tattao, pannakaiwardas ti trapiko, ken mangipaay iti madagdagus a tulong kadagiti agkasapulan.
Kuna ni Evangelista a sinaganaanda a naimbag para iti Undas. Naiplastar dagiti assistance desk kadagiti kamposanto, terminal, ken kadagiti lugar a nakaro ti trapiko, tapno adda madagdagus a dumawatan dagiti tattao iti tulong.
Gutigoten ti PRO-1 dagiti umili nga agtalinaed a naalibtak ken agbalin a mannakitinnulong, ken ipulongda ti ania man a mapagduaduaan nga aktibidad kadagiti polis wenno assistance desk.
Innayon ni Evangelista a sikukumitda a mangsalaknib kadagiti umili bayat ti pananglagip dagitoy kadagiti minatayda. Babaen ti tulong ken pannakikaykaysa dagiti komunidad ken katinnulong a grupo, kalikaguman ti polisia a natalged ken natalna ti pannakaiwayat ti Undas ita a tawen.
Para iti ania man a tulong wenno emerhensia, mabalin a kontaken dagiti umili ti kaasitgan nga istasion ti polisia wenno umawag iti PRO-1 hotline.
Freddie Lazaro/AS Tabag/Bannawag
