SIUDAD TI TABUK, Kalinga – Dua nga estudiante iti Grado 9 ti natay ken tallo a sabsabali pay ti nasugatan iti panagdinnungpar ti maysa a motorsiklo ken maysa a traysikel itoy a siudad idi kalman, Oktubre 28, Lunes.

Kinuna ni Tabuk police spokesperson Police Master Sgt. Prodencio Atas a nainaganan dagiti biktima a kas Hazam B. Bawalan ken John Raye S. Vasquez, agpada a nakikalubbon iti motorsiklo a minaneho ni Webster S. Balucnit, maysa met laeng nga estudiante iti Grado 9.

Maibatay iti naiwayat nga imbestigasion, linagto ti motorsiklo ni Balucnit ti center island ti Manuel Agyao Boulevard ket nakadinnungparna ti maysa a sumungsungad a traysikel.

Lokal

Ilocos Sur, Umuna a Puesto iti Regional SubayBAYANI Awards

Agpapada a nasugatan da Balucnit ken dagiti nakikalubbon kenkuana a da Bawalan ken Vasquez. Intaray ida dagiti immarayat a polis iti ospital ngem saanen a nakalasat da Bawalan ken Vasquez.

Nasugatan met da Francis A. Mag-aso, ti drayber ti traysikel, ken ni Joyce A. Bangguiyao, maysa a mannursuro.  (Freddie Lazaro/ Manila Bulletin)