Maysa a tuleng ken umel a babai iti Brgy. Bagalay, Tayum, Abra ti natay a napaltogan iti mismo a balayna idi rabii ti Domingo, Oktubre 27, 2024. Maysa a kandidato a konsehal iti eleksion iti umay a tawen ti maatap a nangpapatay iti nasao a babai.
Innaganan ni Police Capt. Michael Joe Dasalla, hepe ti polisia iti Tayum, ti biktima a kas Florida A. Teneza, 39.
Agnagan met iti Bobby Briosos ti maatap a pimmatay, kas kinuna ni Dasalla. Maysa a dati security guard ni Briosos manipud iti Brgy. Mudiit, Dolores, Abra, ken kandidato a konsehal itoy nga ili iti babaen ti Asenso political party.
Maibatay iti police report, daras a pimmanaw ni Briosos kalpasan ti pammapatay ngem nakemmeg dagiti kameng ti polisia iti balay daytoy.
Dua nga umili ti Santa, Ilocos Sur, naipaayan iti Fr. Jose Burgos Award
Ti kabsat ni Tenesa, a maysa met laeng a tuleng ken umel, ti nangitudo ken ni Briosos a nangpapatay ken ni Tenesa kalpasan a naipakita kenkuana ti retrato ni Briosos.
Kinuna ni Dasalla a mabalin nga imon ti motibo ti pammapatay. Adda ita iti kustodia ti polisia ni Briosos a manamnama a makasuan iti kaso a murder wenno a naplano a pammapatay. (Freddie Lazaro/ Manila Bulletin)
