Duapulo ket maysa (21) a container a naglaon iti frozen a mackerel a naipuslit manipud China ti sinamsam ti Bureau of Customs (BOC) iti Manila International Container Port (MICP) kas paset ti pananglabanda iti illegal a panag-import kadagiti produkto ti agrikultura.
Pinatpatta ti Customs Intelligence and Investigation Service (CIIS) nga agpateg iti P8.5 milion ti mackerel a linaon ti tunggal container ket aganay a P178.5 million ti balor dagiti nasamsam.
Idi Oktubre 16, inrekomendar ti CIIS ti pannakay-issue ti pre-lodgment control order iti nasao a 21 a container gapu iti mapagduaduaan a report mainaig kadagiti kargamento.
Iti maysa a pakaammo, kinuna ni BOC Commissioner Bienvenido Y. Rubio a naramid ti control order request gapu iti pakaseknan maipapan iti misclassification, misdeclaration, ken saan a naideklara a produkto (goods) iti shipment.
Impakaammo ni CIIS Director Verne Enciso a dimteng dagiti 21 a container a naglaon iti frozen a mackerel iti MICP iti napalabas a bulan, a namkuatan ti Bureau of Fisheries and Aquatic Resources (BFAR) a nagsaludsod maipapan iti importation requirement ken kasasaad ti SPS Import Clearance (SPSIC) ti consignee.
TRO kontra iti proseso ti Kamara iti impeachment ni VP Duterte, kiniddaw dagiti abogado
Naammuan ti BFAR a saan a nagaplay ti importer, ti Pacific Sealand Foods Corporation, iti mackerel importation iti nagbaetan ti Agosto 30 ken Septiembre 16.
Kas impadamag ti BOC, napagkedkedan dagiti simmaruno nga aplikasionda kalpasan a sinuspende ti Department of Agriculture (DA) ti pannangted iti clearance para iti panagangkat iti round scad, mackerel, ken bonito.
Kinuna ni Enciso nga iti agdama, agur-urnongda iti impormasion maipapan iti consignee dagiti shipment ken isagsaganada dagiti kaso a mabalin nga ipilada.
Derco Rosal//Juan A. Asuncion/Bannawag
