Umad-adayon iti Batanes ni Super Typhoon Leon (internasional a nagan: Kong-rey) ngem naibayog latta ti Tropical Cyclone Wind Signal (TCWS) No. 4 iti nasao a probinsia, segun iti Philippine Atmospheric, Geophysical and Astronomical Services Administration (PAGASA) ita nga aldaw, Oktubre 31.
Itay 7:00 ti agsapa, nasaripatpatan ti mata ni Bagyo Leon iti 110 a kilometro amianan-amianan a daya ti Itbayat, Batanes, ket agpaamianan a laud iti kapardas a 20 kilometro tunggal oras.
Nagtalinaed ti pigsa ni Leon a 195 a kilometro tunggal oras iti asideg ti sentrona ken pugso a 240 a kilometro tunggal oras.
Naibayog iti TCWS No. 3 ti amianan a paset ti Babuyan Islands.
Australiano, 2 pay, natiliw gapu iti bogus a doliar
Agtalinaed iti TCWS No. 2 ti dadduma paset ti Babuyan Islands, amianan a paset ti kadaklan a Cagayan, amianan a paset ti Apayao, ken amianan a paset ti Ilocos Norte.
Adda latta iti TCWS No. 1 ti dadduma a paset ti Cagayan, Isabela, ti dadduma a paset ti Apayao, Abra, Kalinga, Mountain Province, Ifugao, amianan a paset ti Benguet, ken ti dadduma a paset ti Ilocos Norte, ken Ilocos Sur.
Segun iti PAGASA, manamnama a rummuar ni Leon iti Philippine Area of Responsibility ita a rabii ti Huebes (Okt. 31) wenno agsapa ti Biernes (Nob. 1). (Ellalyn De Vera-Ruiz/Manila Bulletin//Lito Hilidon/Bannawag)
