(Mensahe ni Jenny Alcausin, Sponsor ti Mario Abinsay Albalos Literary Awards, iti Pammadayaw a Seremonia para kadagiti nangabak iti Salip iti Sarita ti 8th Albalos Awards idi Oktubre 18, 2024 bayat ti Dap-ayan 2024 ti GUMIL Filipinas a naangay iti Aloha Nui Hotel, Candon City, Okt. 18-20, 2024.)
Appo nga opisial ti GUMIL Filipinas nga idauluan ni Apo Ariel S. Tabag, agyamankami iti panangtedyo iti gundaway tapno iti daytoy manen nga okasion a mapadayawan dagiti nangabak iti pasalip ti Mario Abinsay Albalos Foundation Literary Awards.
Ipalubosyo ngarud, appo, ta idanonko ti kablaawko kadagiti nangabak iti Maika-8 a Salip iti Panagsurat iti Sarita ti Albalos Awards, da Apo Jefferson Somera, Apo Jorge Richard P. Guerrero, ken ti Grand Prize Winner, ti kaprobinsiaak a ni Michelle Gamueda-Rafanan. Nairanrana nga iti panaggibus ti pasalip ti Albalos Awards, maysa a padak a taga-Ilocos Sur ti Grand Prize Winner, saan ket a taga-Siudad ti Laoag a ni Apo Jorge Richard P. Guerrero. Ala, Apo Jorge, ta sika met ti nangabak iti umuna a gunggona iti nagsaruno a dua a napalabas a pasalip ti Albalos Awards. Agyamanak ta impasublatmo iti Ilocos Sur ti koronam.
Lima a tawen laeng idi ti planomi ken Cles a panagpaut ti Salip iti Sarita ti Albalos Award. Ngarud, naggibus koma idi Tawen 2021. Panawen idi ti COVID isu a virtual pay ti pannakapadayaw dagiti nangabak a kas iti virtual met laeng a pannakapadayaw dagiti nangabak sakbayna, iti Tawen 2020. Ngem nanayonan pay iti tallo a tawen gapu ta nalaing nga umud-od ni Cles.
Manipud Kadagiti Agdama a Kameng ti Bannawag: Dios ti Agngina!
Nupay maisardeng pay laeng ti pasalip ti Albalos Awards kalpasan ti maika-8 a tawenna, di ammo no ania ti yeg ti masakbayan. Ta ti numero 8 nagasat a numero, agpangato no isuratmo. Kayatna a sawen, panagdur-as. Isu la ngarud nga adu ti agkakasar iti petsa nga addaan iti numero otso.
Manen, Dios ti agngina iti panagkakaduatayo iti walo a tawen. Appo a naghurhurado iti pasalip, awan koma ti mapadayawan no awankayo. Dios ti agngina, Johnny, Ariel, Linda, Neyo, Estela. Ken kadagiti amin a nakisalsalip manipud umuna agingga iti maikawalo a salip. Thank you iti adu. Impakitayo ti panangipatpategyo iti lagip daydi kabsatyo a Mario Albalos babaen ti panangsuportaryo iti Mario Abinsay Albalos Foundation Literary Awards.
Pudno, diak ammo ti agsurat, gapuna nga addaak laeng iti igid nga umap-apal iti laingyo nga agsurat. Ngem napateg met kaniak ti Literatura Ilokana. Ti literatura nga impatpateg daydi kabsatyo a Mario nga isu a nakaipanaganan ti salip. Malaksid iti dayta, uray awanak iti bukodko a daga, maysaak pay laeng nga anak ti Amianan.
Idawdawatko ti panagballigi ti komperensia nasional ti GUMIL Filipinas. Kablaawankayo amin a delegado manipud iti Hawaii, Cagayan, Ilocos Norte, Ilocos Sur, Abra, Apayao, La Union, Pangasinan, Benguet, Nueva Vizcaya, Isabela, Metro Manila, ken kadagiti dadduma pay a lugar a diak nainaganan.
Dios ti agngina!
Agpakanawan: Cles B. Rambaud, Chair, Secretariat, Albalos Awards; Ariel S. Tabag, hurado; Juan Al. Asuncion, pangulo a hurado; Michelle Gamueda-Rafanan, Grand Prize Winner; Arnel Asis (nangibagi ken ni Jorge Richard P. Guerrero, 2nd Prize Winner); ken Lean Jefferson Somera (nangibagi ken ni Jefferson M. Somera, 3rd Prize Winner). Saan a nairaman iti ladawan ni Linda T. Lingbaoan-Bulong, hurado. (Rinetrato ni Rey Joel B. Guerrero)
