Maysa a cargo plane ti military a nagibiahe iti relief goods iti Batanes ti naikkatan iti akinsango a landing gear tire iti panagdissona iti eropuerto ti Basco idi Biernes, Nobiembre 1, segun iti Armed Forces of the Philippines (PAF).
“Pagsayaatanna ta awan ti nadangran kadagiti piloto ken dagiti nakalugan a military personnel iti nasao a medium size military cargo plane C295,” kinuna ni Col. Francel Margareth Padilla, spokesperson ti AFP, iti maysa a pakaammo.
Innayon ni Padilla iti pakaammo nga indeliber ti nasao nga eroplano iti Office of Civil Defense (OCD) dagiti Family food packs a para kadagiti residente ti Batanes a dinidigra ni Bagyo Leon.
Napasamak ti nasao nga insidente iti agarup alas tres (3 PM) iti malem ti Biernes, kinuna ti pakaammo a madaman ti panangim-imbestigarda no ania ti nakaigapuan ti napasamak tapno maisigurado a natalged ken naballigi dagiti operasionda iti masanguanan.
Listaan dagiti nakapasa iti 2024 Philippine Bar Examination
Impanamnama ketdi ti AFP ken ti Philippine Air Force nga ituloyda ti mangidanon kadagiti napapateg a kasapulan kadagiti komunidad a naapektaran ti kalamidad iti laksid ti napasamak.
Aaron Recuenco/Manila Bulletin
