Kuna ti Philippine National Police (PNP), natalinaay ti pakabuklan ti pannakarambak ti All Saints’ Day itoy Biernes, Nobiembre 1.
Kuna ni PNP spokesperson Police Brig. Gen. Jean Fajardo, awan ti madi nga insidente a namonitor kadagiti kamposanto, columbaria, memorial park ken dadduma pay a kapadada a lugar a napan nangsuknalan dagiti Filipino kadagiti pimmusay a patpatgenda iti biag iti laksid ti tudo.
“Iti pakabuklanna, natalinaay ta awan ti madi a napasamak,” kinuna ni Fajardo.
Naideploy ti nayon a polis tapno masigurado a naurnos ken natalged ti atiddog nga arinunos ti lawas.
Kasano a labanan ti cyberthreat kadagiti pirate site?
Iti pannakabilangda iti alas tres ti malem iti Nobiembre 1, mapan a 40,113 a polis ti naiwarasen ti PNP.
Iti interbiu iti DZEC 1062 Radyo Agila, kuna ni Fajardo nga agtultuloy ti panagmonitorda ita Aldaw Dagiti Kararua ta manamnama nga itultuloy dagiti Filipino ti mapan kadagiti kamposanto ken columbaria.
Kasta met nga itultuloy ti PNP ti agbantay ta manamnama nga ilaylayon metten dagiti kakailian ti agrelaks iti Domingo. Mabantayan ngarud dagiti nadumaduma a tourist spot, ken maiplastar latta dagiti Police Assistance Desk (PAD) kadagiti dadakkel a transportation hub tapno mabantayan ken matarabay dagiti agbiahe a kakailian.
Kabayatanna, pinalagipan ti PNP ti publiko a siguraduenda a natalged dagiti panawanda a pagtaenganda tapno maliklikan ti panagballigi dagiti kriminal nangruna dagiti agtatakaw.
Kasta met a naipalagip a siguraduen nga awan ti nakasindi a kandila ken nakasaksak nga aplayanses sakbay a panawan ti pagtaengan. No met agbiahe babaen ti pribado a lugan, siguraduen a nakakondision ti lugan, ket no babaen ti public transportation, aywanan a naimbag dagiti bagahe. (Martin Sadongdong/MB/AST/Bannawag)
