BONTOC, Mountain Province—Nasapulanen dagiti autoridad ti bangkay ti maysa nga agtutubo a lalaki a nalmes iti Chico River iti Dawdawan, Supang, Sabangan, Mountain Province.
Binigbig dagiti autoridad ti biktima a ni Juneil Crey Liwaliw Bagwan, agtawen iti 14.
Inyanud ti napigsa nga agus ti karayan ti biktima idi Oktubre 31, nasarakanda ti bangkayna itay Nobiembre 2 kalpasan ti tallo nga aldaw a napinget a panagsawar iti baet ti napigsa a tudo gapu ken ni Bagyo Leon.
Nasarakan ti bangkay ti biktima babaen ti pannakitinnulong ti Bureau of Fire Protection ken ti Provincial Disaster Risk Reduction Management Council.
Baro a Bangui Bypass Road, manamnama a mangpalukay iti trapiko iti Amianan a Luzon
Impeksa ni Gob. Bonifacio C. Lacwasan Jr. ti pannakipagriknana iti pamilia ti biktima ken nagyaman kadagiti nakipaset iti search and retrieval operation.
Kinuna ni Lacwasan Jr. a ti panagballigida a nangsapul iti biktima ket bunga ti agtultuloy a kinabileg ti espiritu ti panagbibinnadang ken panagkaykaysa dagiti tattao iti komunidad aglalo iti panawen ti rigat.
(Zaldy Comanda// Juan A. Asuncion/Bannawag)
