Mangrugin a lumamiis ti pul-oy gapu iti northeast monsoon season, a pagaammo a kas amian (amihan).
Segun iti Philippine Atmospheric, Geophysical and Astronomical Services Administration (PAGASA), mabalin a pinapigsa ti ilalabas ti Tropical Storm a “Marce” ti umamianan a daya a surface wind flow, a nangyeg iti damo a palayupoy ti nalamiis nga angin a mainaig iti amian.
Iti maysa a pannakiuman iti media idi Lunes, Nobiembre 4, kinuna ni PAGASA Assistant Weather Services Chief Chris Perez a mairuar ita a lawas ti opisial a waragawag a mangipakaammo iti panangrugi ti panawen ti amian.
Mangrugi ti amian iti nagbaetan ti maudi a lawas ti Oktubre ken umuna a lawas ti Nobiembre. Agpaut daytoy agingga iti Marso, a ti kalamiisna ket manipud Enero agingga iti Pebrero. (Ellalyn De Vera-Ruiz/MB //Roy V. Aragon/Bannawag)
