Inwaragawag ti Departamento ti Agrikultura (DA) ti 10 agingga iti 15 a porsiento nga ingangato ti presio dagiti kangrunaan a highland ken lowland a natnateng gapu iti panagbaba ti suplay manipud kadagiti kangrunaan a lugar ti produksion a naapektaran ti bagyo a ‘Kristine.’
Segun ken ni Assistant Secretary Arnel De Mesa, pannakangiwat ti DA, bayat ti media briefing idi Lunes, Nobiembre 4, nga adu ti nadadael a mulmula kadagiti kangrunaan a lugar ti produksion kas kadagiti rehion ti Cordillera, Cagayan Valley, CALABARZON, ken Central Luzon, a nakaigapu iti pannakakissay ti nasurok a 28,000 a tonelada metriko iti suplay ti nateng.
Kinuna ni De Mesa nga adda ketdi alternatibo a pagtaudan ti nateng iti pagilian manipud iti Visayas, Mindanao, ken dagiti paset ti Luzon a saan unay a naapektaran ti bagyo.
Innayonna a nakikoordinar ti Agribusiness and Marketing Assistance Service (AMAS) ti DA kadagiti regional field office para iti market matching tapno maiturong manen dagiti saan a naapektaran a produkto kadagiti apektado a rehion.
Ilocos Sur, Umuna a Puesto iti Regional SubayBAYANI Awards
“Agtultuloy met ti pannaka-deploy dagiti Kadiwa Center kadagiti apektado a lugar tapno makatulong a mangipaay iti nababbaba ti presiona nga agrikultural a produkto,” kinuna pay ni De Mesa. (Jel Santos/MB // RVAragon/Bannawag)
