Impaganetget ni Senate President Francis Escudero a masapul nga usigen a naimbag ti singasing a pannakaitantan ti eleksion iti Bangsamoro Autonomous Region in Muslim Mindanao (BARMM), kasta met ti pannakiuman kadagiti maseknan ta mairaman ti interes dagiti nadumaduma a gunglo ti rehion.
Daytoy ti kinuna ni Escudero itay Nobiembre 4 kalpasan nga indatagna ti Senate Bill No. 2862 a mangkiddaw iti pannakaitantan ti umuna a BARMM parliamentary elections inton Mayo 11, 2026.
Panggep ni Escudero a tamingen ti pangngeddeng ti Korte Suprema (SC) a mangilaksid iti Probinsia ti Sulu a kas paset ti BARMM, ken kasapulan a mabalbaliwan dagiti hurisdiksion ken mangituding manen kadagiti posision iti parlamento a buklen ti 80 a kameng.
Inlawlawag ni Escudero a gapu iti impaulog ti Korte Suprema, masapul nga aturen ti agdama a linteg, partikular ti Republic Act No. 11054, ken ti Bangsamoro Parliamentary Districts Act of 2024, a mangikeddeng a 80 ti agpaay a kameng ti Bangsamoro Parliament.
Iti pangngeddeng ti Korte Suprema, pinatalgedanna a nainkalintegan ti Bangsamoro Organic Law (BOL), ngem indeklararna a saan a paset ti BARMM ti Sulu ta sinupiat daytoy ti pannakaratipikar ti BOL idi naiwayat ti plebisito idi 2019.
Video ti China Daily, kinondenar ti DFA
Impasdek ti BARMM Parliament ti 32 a parliamentary district, agraman pito iti Sulu, a masapul a maiwaras ita.
Segun ken ni Escudero nasken a marisut no kasano a maiwaras dagiti pito a pannakabagi ti Sulu a naikkat, idinto a saan a basta maikissay dagitoy.
Iti sabali a bangir, agtultuloy latta ti Commission on Elections (Comelec) nga umawat iti certificates of candidacy para iti 2025 BARMM parliamentary election agingga Nobiembre 9, bayat nga ur-urayenda ti aramiden ti Kongreso iti posible a pannakaitantan daytoy. (Wilnard Bacelonia/PNA//Lito Hilidon/Bannawag)
