Inadaptar ti Senado ti singasing a PhP733 a milion a badiet ti Office of the Vice President (OVP) nga inaprobaran ti Kamara iti bersionda ti 2025 General Appropriations Bill (GAB).
Kinompirmar ni daulo ti Senate Committee on Finance Senadora Grace Poe ti pangngeddeng ti komite itay Nobiembre 5 sakbay nga isponsoranna ti singasing a PhP6.352 a trilion a 2025 GAB.
Kinuna ni Sen. Poe a namin-adun a nakiumanda iti OVP ket kiniddawda a mangted daytoy kadagiti dokumento tapno malawlawagan dagiti parikut mainaig iti badietda, ngem saanda a nangidatag iti ania man a dokumento agingga ita, isu nga inkeddengda nga agtalinaed ti gatad ti pondo ti OVP kas nailanad iti 2025 GAB.
Sakbay daytoy, insingasing ti House Committee on Appropriations a makissayan koma ti pondo ti OVP gapu ti panagkedked ni Bise Presidente Sara Duterte a sungbatan dagiti saludsod dagiti diputado no kasano a nausar ti pondo ti OVP. (Hannah L. Torregoza/Manila Bulletin//Lito Hilidon/Bannawag)
