Indagadag ni Senate Minority Leader Aquilino Pimentel III iti Department of Transportation (DOTr) ita, Nobiembre 7, a mangbukel daytoy iti annuroten a kaarngi iti Estados Unidos (US), a mangmandar kadagiti kompania ti eroplano a mangipaulog iti automatiko a pannakaisubli ti kuarta gapu kadagiti makanselar wenno mataktak a biahe ti eroplano.
Maibatay iti annuroten ti US, mandaranna dagiti kompania ti eroplano a mangipaay iti cash refund uray awan kiddaw ti pasahero kasta met ti paglintegan para iti naladawen a pannakaisubli dagiti bagahe.
Patien ni Pimentel a babaen daytoy nga annuroten, magutigot dagiti kompania ti eroplano a pasayaatenda ti serbisioda ken liklikanda dagiti maitantan ken makanselar a biahe a mangdadael iti padas ti panagbiahe.
Dinakamat ni Pimentel ti maysa a pasamak idi Hulio 19 nga adu a domestic ken international flights ti naapektaran gapu iti pannakapukaw ti sistema ti Microsoft a nakaigapuan ti pannakasinga ti operasion dagiti eroplano iti sangalubongan, a nangriribuk kadagiti rinibu a pasahero.
Listaan dagiti nakapasa iti 2024 Philippine Bar Examination
Segun iti baro a pagalagadan nga impaulog ti US Department of Transportation, automatiko a makaawat iti refund dagiti pasahero no pilienda ti saan nga aglugan iti na-rebook a biahe gapu iti dakkel a pannakasinga, ket agbalin a nalaklaka ti proseso ti refund. (Wilnard Bacelonia/PNA//Lito Hilidon/Bannawag)
