MAPANEN a 60 a tawen nga agserserbi iti media ni Manang Honorata Arlante nga ad-adda nga am-ammo iti birngasna a Manang Lolen. Agam-ammokami unay. Iti naminsan a nakitanak, daras pay a sinabatnak a ti la gayam kayatna nga ibaga, isu ti panagbasbasana iti Bannawag, a pakakitkitaanna kano metten iti naganko.

Agpayso a makunan a super ti kinabeterana ni Manang Lolen iti panagirakurak. Adda pay laeng idi iti hayskul, mangmangngeganen ti bosesna iti DZJC – estasion ti radio a masarakan pay laeng idi iti Life Theatre iti sentro ti Laoag.

Nayanak ni Manang Lolen idi Mayo 28, 1948. Nag-valedictorian iti panagturposna iti elementaria iti Holy Ghost Academy of Laoag. Idi addan iti hayskul iti isu met laeng a pagadalan, tinawen a mapadayawan a kas honor student.

Kadua ni Manang Lolen ni Mr. Jojo Clemente, mangimatmaton ti Magik FM Laoag.

'Ania Pay ti Kayatmo, Saankan a Mapitakan!'

Kunana a masansan idi a pumasiar iti DZJC no aggapu iti pagadalanda. Ditoy a natakuatan dagiti mangimatmaton iti estasion ti talentona iti broadcasting – ket inikkanda iti gundaway nga agibasa kadagiti nadumaduma a pakaammo.

Naisardeng laeng ti panagampayag ti bosesna iti tangatang idi agkolehio ta nagturong iti Manila tapno mangala iti Bachelor of Science in Business Administration iti University of the East.

Idi nagturpos, nagtrabaho iti accounting section iti Family Savings Bank iti Laoag – ngem insamsamirana latta ti tumultulong kadagiti programa ti DZJC.

Kalpasan ti lima a tawen, pinanawanna ti trabahona iti banko ta sinurotna ti arapaapna iti media; nagtrabaho iti DZYN a masarakan idi iti asideg ti Ilocos Norte National High School. Ngem daksanggasat ta nagserra ti nasao nga estasion idi dimteng ti martial law.

Nupay kasta, saan a naputed ti panagserbina iti media ta innala ti DZJC a kas field reporter – inikkanda pay iti bukodna a programa a naawagan iti Love on the Air.

Nakallalagip para ken ni Manang Lolen ti programana ta arigna matchmaking ti format daytoy. Ditoy nga agaammo dagiti babbaro ken babbalasang nga agsarsarak iti kaayan-ayat – ket adu ti nagtungpal iti panagkallaysa gapu iti daytoy a programa.

Ni Manang Lolen idi kabambanuaganna.

Napaut ti panagserbi ni Manang Lolen iti DZJC, ngem napadasanna met ti nagpaay kadagiti sabali a radio station iti Laoag, kas koma iti DWLW, DWRI, ken GMA.

Iti agdama, agpapaay iti Magik FM Laoag. Malaksid laeng a field reporter, adda pay programana a naawagan iti Usapang Katambay a pagpaayan kas co-anchor-na ni Jojo Clemente, ti mangimatmaton iti nasao nga estasion.

Segun ken ni Manang Lolen, alas singko pay laeng iti bigat, adda isunan iti ruar nga agipatpatayab iti report. Sakbay met nga agalas siete iti bigat, masapul nga addan iti estasionda para iti dua nga oras a programada; kalpasan ti programa, rummuar manen tapno agkalap iti damag.

Akuenna a no maminsan, gapu iti bannogna, mairidepna kadagiti pagtutugawan iti Aurora Park iti Siudad ti Laoag wenno iti Bonsai Garden iti lauden a paset ti Ilocos Norte Provincial Capitol.

Ngem iti likud ti kidag ti edad, imbatad ni Manang Lolen nga awan pay planona nga agsardeng iti trabahona. Ta patienna nga adda pay nabatbati a pigsana nga agserbi iti ay-ayatenna unay a benneg – ti media.

Adda maysa a pakaasi ni Manang Lolen kadagiti agkabannuag a reporter – ti panangmantenerda koma iti balanse a panagipadamag. Kunana a saan laeng koma a ti paglatakan ken pagbaknangan ti estasionda ti pampanunotenda; ketdi, panunotenda koma pay ti integridad ti panagirakurak—ket daytoy met laeng a prinsipiona ti pangap-apresiaran kenkuana dagiti kalugaranna iti Siudad ti Laoag.–O

(Naipablaak iti Bannawag, Hulio 16-31, 2024 a bilang.)