TAWEN 1999 idi damok a makatungtong ni Nick Malasig a volunteer reporter pay laeng idi iti DZJC iti Siudad ti Laoag. Ita, kalpasan ti agarup 25 a tawen, sabalin a Nick Malasig ti makatkatungtongko – maysan nga abogado, ken isunan ti station manager ti DZJC.

Nayanak ni Nick Natividad Malasig II idi Septiembre 14, 1980 iti Barangay 3, Vintar, Ilocos Norte. Nupay AB Political Science ti innalana iti Northwestern University, kinulding ti broadcasting ti riknana.

Tallo a tawen a nag-volunteer reporter iti DZJC. Ket kalpasan a nagturpos iti kolehio idi Abril 2000, innalan ti nasao nga estasion a kas regular a reporter-da. Malaksid laeng a reporter, pinag-anchor pay ti DZJC kadagiti nadumaduma a programada.

Ni Atty. Nick Malasig, kaduana ti kaingungotna a ni Mary Grace nga agpapaay iti Department of Education.

'Ania Pay ti Kayatmo, Saankan a Mapitakan!'

PHOTO

Gapu iti impakita ni Nick a kinagaget ken kinasaririt, nadutokan nga assistant manager ti DZJC idi 2017. Ket iti simmaruno a tawen, nayawaten kenkuana ti pannakaimanehar ti estasion a kas station manager.

Dakkel a karit kenkuana ti panagbalinna nga station manager, nangruna idi dimteng ti pandemic. Ngem nupay panawen idi ti angol, napnuan regget latta ni Nick a nangidaulo ti estasionda – isu a di naputed ti panagserbi ti DZJC. Kinaagpaysona, isuda payen idi ti mangidandanon iti nadumaduma a tulong kadagiti barbarangay.

Nagbunga dagiti sakripisio ti DZJC iti babaen ti liderato ni Nick ta nagtalinaed ti DZJC a maysa kadagiti kapipigsaan nga AM radio station iti Ilocos Norte.

Inraprapin met ni Nick ti nagbasa ti abogasia iti likud ti kinaadu dagiti pakakumikomanna iti lubong ti broadcasting – naipasana ti November 2022 Bar Examination. Ket iti panagbalinna nga abogado, nanayonan manen dagiti serbisio nga iburburay ti estasionda. Ta arigna nagbalinen nga extension ti Public Attorney’s Office ti DZJC ta babaen ti programada nga Operation Tulong, libre dagiti serbisio legal nga ipapaay ni Nick – a pakairamananen ti pannakanotario dagiti dokumento.

Di mailibak a nagbaliwen ti biag ni Nick gapu iti panagburnok ti balligi kenkuana. Ngem adda maysa a banag a nadlawko a nagtalinaed iti kinataona – ti kinapakumbaba a nakitak kenkuana idi damomi ti agpatang idi tawen 1999.–O

(Naipablaak iti Bannawag, Agosto 1-15, 2024 a bilang.)