WEN, “Mister Action Man.” Daytoy ti yaw-awag dagiti fans-na iti Aksyon Radyo DZNL a pagpapaayanna ita kas anchorman. Iggemna ti “Aksyon Hotline” a pakatamingan dagiti problema iti barangay tapno maisapulan kadagiti maitutop a pangrisut, malaksid kadagiti news update, nasional ken global.

Isu ni Edwin Morales Carbajal, anawnser-anchorman-reporter iti nasuroken a tallo a dekada iti tay-ak ti broadcasting kadagiti tallo a nalalatak nga estasion ti AM Radio ditoy Siudad ti San Fernando, La Union—26 a tawen iti Radyo Bombo DZSO; 6 a tawen iti Radyo DZNL (affiliate ti Radyo DZRH a nakabase iti Metro Manila), ken nasurok a makatawen iti DZYR.

Iti programana iti DZNL nga “Aksyon Hotline” (8-9 AM, FB Live Aksyon 242 13 60), agawat ni Ed (awagna kadagiti kasingedna) kadagiti reklamo dagiti bumarangay, kas pagarigan, dagiti nakagarut a dingo dagiti kaarruba nga agsiba kadagiti mula iti taltalon ken arubayan, wenno dagiti nakabulos nga aso. Kalpasanna, awaganna dagiti maseknan—dagiti akinkukua ken dagiti opisial ti barangay—tapno marisut a dagus ti problema.

Iwaragawagna pay dagiti aktibidad a pakipasetan dagiti bumarangay nga adda pakainaiganna iti salun-at, sanitasion, edukasion, ken skills training. Ibinsabinsana payen dagiti ordinansa ti barangay, agraman dagiti maitutop a pannusa wenno multa dagiti aglabsing.

'Ania Pay ti Kayatmo, Saankan a Mapitakan!'

No adda kalamidad a kas iti bagyo, ginggined, layus, ken uram, adda latta ti DZNL a tumultulong kadagiti biktima.

Iggem pay ni Edwin ti programa a “Johnny Tanggo Ang Pagbabalik” (10-11 AM) a dati nga iggem daydi Dios-ti-aluadna a Pol Datangel, manager ken anaunser ti nasao nga estasion. Ni Wally Abuan ti agdama nga station manager.

ITI Radyo Bombo DZSO, isu ti anchorman ti “Bombo Hanay Big-time” (7:30-9 AM), “Reports 1/ Damdamag” (5-6 PM), ken “Reports 3 / Damdamag 3” (4-6 PM). Ditoy, agawat kadagiti ‘kappuros’ nga impormasion ken hot issues nga ‘ibato’ dagiti reporter, agraman dagiti report manipud iti kuerpo ti polisia. Kalpasanna, pakuyogan metten ni Ed kadagiti mainaig a komentario a pangsarakuy kadagitoy.

Iggemna pay ti programa a “Kahapon Lamang” (1-2 PM). Ditoy, agibasa kadagiti ‘padpadas ken ayat’ manipud kadagiti fans-na.

Gapu iti saet ken reggetna iti trabahona, nadutokan ni Ed  kas assistant station manager, sa OIC station manager.

KAS agdadamo idi iti broadcasting, naawat ni Ed a kas reporter iti DZYR kalpasan a naggraduar iti St. Louis College iti Lingsat, Siudad ti San Fernando iti kurso a Bachelor of Science in Education, History major. Nagtalinaed ditoy iti makatawen. Ditoy metten a nasirpatna ti nagbalin a kaingungotna a ni sigud a Salve Maria Abuan Barnachea, empleado ti Benguet Electric Cooperative (Beneco) ken anak daydi Zosimo Abuan Barnachea ti Sawat, Tagudin, Ilocos Sur a mannurat ti Bannawag, ken Mercedes Abuan Barnachea ti Bauang, La Union, agpada a mannursuro iti Sacred Heart School. (Ikit ni Salve daydi Mila Abuan, station manager ti DZYR; kabagian daydi tatangna).

Tubo ti Sto. Domingo Sur, Luna, La Union, nayanak ni Ed idi Sept. 18, 1965. Dadakkelna da Domingo Nacionales Carbajal ken Gloria Julaton Morales. Napagasatanda ken Salve iti dua nga annak, da Maria Cristina, 34, ken Carl Edmar, 30. Agindeg ti pamiliada iti Central East, Bauang, La Union.—O

(Naipablaak iti Bannawag, Sept. 1-15, 2024 a bilang.)