DAGITI panid ti Bannawag ti nagsursuruan ni Manang Celestina “Cely” Calonge Paz nga agbasa iti Ilokano. Magustuan kano ngamin daydi lolana a Tomasa dagiti artikulo iti Bannawag. Ngem gapu ta di met ammo ti baket ti agbasa, ayabanna no kua ni Manang Cely a mangibasa kenkuana kadagiti linaon ti magasin. Ditoy ti nakatenneban ni Manang Cely iti Ilokano a nagserbi a kangrunaan nga igamna iti panagbalinna a broadcast journalist.

Naipasngay ni Manang Cely idi Mayo 19, 1963 iti Badoc, Ilocos Norte. Nagturpos iti AB Mass Communication iti Far Eastern University iti Manila. Nangala pay iti Master of Arts in Public Administration iti Mariano Marcos State University – thesis laengen ti kurangna tapno agturpos.

Tawen 1983 idi mangrugi nga agpaay a kas information writer iti Ilocos Norte Engineering District ti Department of Public Works and Highways (DPWH). Iti dayta met laeng a tawen, nagkasapulan iti babai a newscaster ti IBC 13 – maysa nga estasion ti telebision iti Siudad ti Laoag.

Gapu ta ammo dagiti kaobraanna iti DPWH ti laingna iti Ilokano, arigna induronda a mapan agaplikar. Pinagustuan ni Manang Cely dagiti kaobraanna – ket sinalsaluyotna ti audition iti IBC 13 gapu iti mano a tawen a panangibasbasana iti Bannawag ken ni lolana a Tomasa.

'Ania Pay ti Kayatmo, Saankan a Mapitakan!'

Nagbalin ngarud a dua ti pagtrabahuan ni Manang Cely: agmalmalem iti DPWH; sa kalpasan ti alas singko iti malem, mapan ag-newscast iti IBC 13. Kinaagpaysona, maibilbilang isuna a kaunaan a babai a local TV newscaster iti Ilocos Norte.

Ngem kalpasan iti nakurang a makatawen, dinuprak ti maysa a napigsa a bagyo ti Ilocos Norte a nangdadael iti tower ti IBC 13. Kas resulta, nagbalin laengen a relay station daytoy ta saanen a makaipatayab pay kadagiti lokal a programa – banag a nangputed iti kina-TV newscaster ni Manang Cely.

Kalpasan met ti uppat a tawen a panagserbina iti DPWH, nagtrabaho iti CT Scan Section ti Makati Medical Center. Ngem nagsubli met laeng iti Ilocos Norte idi 1988 ta naala a kas senior announcer iti DZMM FM – maysa a radio ti gobierno a masarakan idi iti administration building ti Mariano Marcos State University wenno MMSU iti Batac.

Tawen 1990 idi mayakar ti DZMM FM iti Siudad ti Laoag – ket nagbalin daytoy a DWFB Radyo ng Bayan. Nagserbi ni Manang Cely a kas senior announcer ti DWFB, sa nagbalin a broadcast production supervisor idi 1997 – ket idi tawen 1999, nadutokan a broadcast station manager.

Agarup 25 a tawenen nga imanmanehar ni Manang Cely ti DWFB. Ket gapu iti napintas a panangimatonna iti estasionda, nakaawat kadagiti nadumaduma a pammadayaw, kas koma iti Laoag City Sunshine Award – Professional Category idi 2011 ken ti Outstanding Laoaguena Award in the Field of Journalism idi 2018.

Segun ken ni Manang Cely, nupay naundayen a panawen ti panagserbina a kas broadcaster, dinanto pulos malipatan dagiti kanito nga ibasbasaanna iti Bannawag ni lolana a Tomasa, ta dagitoy ti nangbukat iti balligina iti benneg ti panagirakurak –O

(Naipablaak iti Bannawag, Agosto 16-30, 2024 a bilang.)