Naipan iti Tropical Cyclone Wind Signal (TCWS) No. 4 kadagiti dadduma a paset ti Cagayan ken Apayao ita a bigat, Nobiembre 7, gapu iti agtultuloy a pangta ti umas-asideg a Bagyo Marce (internasional a nagan: Yinxing) iti amianan a Luzon.
Iti kaudian a pakaammo ti Philippine Atmospheric, Geophysical and Astronomical Services Administration (PAGASA), maragpat ni Marce ti kangatuan a pigsana inton makadanon iti asideg ti Babuyan Islandas wenno amianan a Cagayan, sakbay a lumasat iti Ilocos Norte manipud iti malem ti Huebes agingga iti agsapa ti Biernes, (Nob. 8).
Nasaripatpatan ti sentro ti bagyo iti 200 a kilometro iti daya ti Aparri, Cagayan, nga addaan iti kapigsa a 155 a kilometro tunggal oras, ken pugso a dumanon iti 190 a kilometro tunggal oras.
Naipan iti TCWS No. 4 ti amianan a paset ti kadaklan a Cagayan, ken amianan a daya ti Apayao.
Listaan dagiti nakapasa iti 2024 Philippine Bar Examination
Nagtalinaed iti TCWS No. 3 ti abagatan a paset ti Batanes, ti dadduma a paset ti Apayao, Ilocos Norte, ken amianan a paset ti Abra.
Adda iti TCWS No. 2 ti dadduma a paset ti Batanes, amianan ken sentro ti Isabela, ti dadduma a paset ti Abra, Kalinga, Mountain Province, ti amianan a paset ti Ifugao, amianan a paset ti Benguet, ken amianan a paset ti La Union.
Signal No. 1 latta iti dadduma a paset ti La Union, Pangasinan, ti dadduma a paset ti Ifugao, ti dadduma a paset ti Benguet, ti dadduma a paset ti Isabela, Quirino, Nueva Vizcaya, ti amianan ken sentro ti Aurora, amianan a paset ti Nueva Ecija, ken ti amianan a paset ti Zambales.
Segun iti PAGASA, manamnama a rummuar ni Marce iti Filipinas inton rabii ti Biernes. (Ellalyn De Vera-Ruiz/Manila Bulletin//Lito Hilidon/Bannawag)
