Nalpasen ti eleksion presidensial iti U.S. iti 2024, ngem mangrugrugi pay laeng ti dalan nga agturong iti Aldaw ti Inaugurasion inton Enero 20. Masapul a masertipikaran dagiti botos kadagiti estado, masapul nga agmiting ti Electoral College, ken bilangen ti Kongreso dagiti botos.
Nagun-od ni President-elect Donald Trump ti Republican Party ti umdas a botos iti eleksion tapno makuna a nangabak iti kinapresidente, uray no saan pay a nalpas ti tunggal estado ti panagbilangda kadagiti balotada. Dagiti estado a mabayag ti panagbilangda ket dagitay agpannuray kangrunaanna kadagiti naikoreo a balota, a kas iti Arizona ken California. Malaksid iti makapnek a panagballigi ni Trump kontra ken ni Bise Presidente Kamala Harris ti Democratic Party, naisubli pay kadagiti Republikano ti Senado—ti benneg ti Kongreso a naikkan iti akem a mangpasingked kadagiti nominasion dagiti agpaay kadagiti korte pederal.
Adtoy dagiti rumbeng a maammuan maipapan iti eleksion ken no ania ti mapaspasamak manipud ita agingga iti inaugurasion ti presidente.
Resolusion ti UN nga agkidkiddaw ti ceasefire iti Gaza, saan a pinaboran ti Estados Unidos
Asino ti nangabak iti popular a botos?
Narigat ti agsao iti pinal maipapan iti popular a botos gapu ta mabilbilang pay laeng dagiti balota, nangruna iti California, a mabalin a sumangpetda babaen ti koreo agingga iti sumaruno a lawas. Iti agdama, umun-una ni Trump iti popular vote ken posible a mapagtalinaedna ti panangidaulona, ngem nalabit a bumassit met daytoy idinto a manayonan ti botos ni Harris, nupay ditay pay ammo no mano.
Ania ti voter turnout wenno mano ti nagbotos iti 2024?
Gapu ta mabilbilang pay laeng dagiti botos, ditay pay masigurado ngem kasla nangato. Nalabit saan a kas idi 2020, a nangipasdek kadagiti rekord para iti kangatuan a turnout iti moderno nga eleksion ti presidente a dua a kakatlo kadagiti amin a kualipikado a botante ti nakipaset. Ngem adu dagiti nagbotos para iti eleksion ti presidente ita a tawen. Iti dadduma nga estado a kaaduanna a nalpasen ti panagbilang, kas iti Michigan, kinuna dagiti opisial a pudno nga adu ti nagbotos itoy a tawen, maysa a rekord, a kas kunada.
Kaano nga agtakem ni Trump?
Naituding ti inaugurasion ni Trump inton Enero 20, 2025. Iti dayta nga aldaw a pormal nga agbalin manen a presidente. Iti agdama, maiwaywayaten dagiti addang para iti pannakabaliw ti administrasion ta kasapulan ti umdas a panawen para iti pannakabukel ti baro a gabinete.
Asino ti mangkontrol iti Kamara ken Senado?
Nagun-od manen dagiti Republikano ti panangtengngelda iti Senado manipud kadagiti Demokratiko, nupay ditay pay no ammo a talaga ti nangabakanda ta di pay met nalpas ti panagbilang iti botos iti dadduma nga estado. Iti biang ti Kamara, di pay ammo no asino ti agbalin a mayoria nupay iti agdama, dagiti Republikano ti mangkonkontrol iti Kamara.
Adda ngata mapasamak a recount?
Awan ti pasimudaag nga addanto recount wenno maulit a pannakabilang dagiti botos iti eleksion ti presidente iti ania man kadagiti estado. Nupay kasta, mabalin nga addanto agpa-recount iti Senado ken Kamara.
Mano a termino a mabalin nga agserbi ti maysa a presidente?
Ti maysa a presidente ket limitado iti dua a termino babaen ti Konstitusion.
Daytoy ti maikadua a termino ni Trump.
Saan a kualipikado ni Trump nga agkandidato inton 2028 ken imbagana a saanen nga interesado nga agpaibotos manen.
Kasano a mapasingkedan ti eleksion ni Trump?
Masapul a malpas dagiti estado ti panagbilangda iti balota ken pormal a sertipikarenda ti nangabak iti popular a botosda inton Dis. 11. Dagiti nangabak iti presidente iti tunggal estado, adda met dagiti elector-da ket agbotosdanto inton agtataripnongda iti Electoral College inton Dis. 17.
Gapu ta addan umdas a bilang dagiti estado a nangabakanna, rumbeng laeng a mangabak met ni Trump iti Electoral College.
Ania ti akem ti Kongreso?
Agmiting ti baro a Kongreso inton Enero 3, 2025. Awatenna dagiti sertipikado a resulta ti tunggal estado iti eleksion ti presidente inton Enero 6, a pormal a manglukat iti dalan para iti inaugurasion ni Trump iti maudi a paset dayta a bulan. (Associated Press/Manila Bulletin)
