NO idaya ni Kagawad Manding (Armando Dela Cruz, 64, ti Brgy. Anao, Piddig, Ilocos Norte) ti lutona a ginettaan a bilagot, di nakakaskasdaaw no nalaka a maibus.
Ket no damom a maramanan, saludsodem la ketdi: “Kasano ti pananglutom, kagawad? Anian a nagimas!”
Kadagiti met nakaramramanen iti ginettaan a bilagot, kunada: “Apay a saan nga agatkiteb daytoy lutom, kagawad?”
Wenno: “Apay saan nga agatsabon? Daytoy man pay la a ginettaan a bilagot ti saan nga agatsabon, aya?”
BROADCAST MEDIA: Asino ni Shalimar?
Ilawlawag met ni Kagawad Manding: “Bugguak a naimbag tapno maikkat dagiti pitak ken darat iti puon dagiti ungkayda.”
Maala ngamin ti bilagot (pikaw kadagiti dadduma) iti bakras dagiti bantay, nangruna iti mataptapliakan ti pekkan (pagay-ayusan ti danum iti bakras dagiti bantay), isu a di maliklikan a maselselan iti pitak ken darat ti puon dagiti ungkay.
Ti ginettaan a bilagot ni Kagawad Manding. (Pammadayaw ti Piddig LGU)
Ikalunikonna dagiti nadalusan a bilagot iti tayab sa igiddanna ti napitpit a naukisan a bawang, laya, ken maikadua a pespes a getta. Paburkenna agingga a lumsa ti bilagot, inayonna ti bugguong sa timtimenna (ikabassitna ti apuy ti paglutuan tapno apagbassit met ti burek ti lutlutuen). Ikkanna iti kalalainganna a kaadu ti suka ti Ilokano inton dandanin maluto. Isagpawnanto metten ti daing a dilis (nasaysayaat ti napudaw a dilis) wenno aramang. Sakbay nga adawenna, ikiwarna ti umuna a pespes a getta. Daytoy ti mangted iti naidumduma a raman ken nanam ti ginettaan a bilagot.
Kuna ni Kagawad Manding a naim-imas pay ti ginettaan a bilagot no palag a karne ti alingo wenno ugsa ti isagpaw. Isina a paluknengen ti karne ti alingo wenno ugsa sa isagpaw kabayatan a timtimtimen ti bilagot.
Da Kgd. Armando dela Cruz ken Godgiven dela Cruz nga anakna iti Basi Revolt Cookfest. Adda iti sangoda dagiti potahe a ginettaan a bilagot (kanawan) ken bistek Ilokano. (Pammadayaw ti Piddig LGU)
“No aglutoak iti bilagot, uray pay aba, kiwarkiwarek tapno madurdor ket sumngaw ti budona. Adda mabati a budo iti ungkayna no di madurdor,” impatigmaanna. Ti kano met getta ti mangikkat iti agatkiteb wenno agatsabon nga angot ken raman ti bilagot.
Kinapudnona, daytoy ginettaan a bilagot ti insalip ni Kagawad Manding iti salip iti panagluto iti kategoria ti natnateng a kas paset ti panangselebrar ti Piddig iti Basi Revolt idi Septiembre 16. (Inyusuat da taga-Piddig a Pedro Mateo ken Saralogo Ambaristo ti am-ammo itan a Basi Revolt, nangrugi idi Sept. 16, 1807). Iti salip, dua a potahe ti lutuen: maysa ti karne a kangrunaan a ramen, ken maysa met ti natnateng. Sangapulo ket uppatda amin a nagsasalip. Kaduana ti barona, ni Godgiven, naglutoda iti Bistek Ilokano ken Ginettaan a Bilagot.
Ket napili a kaiimasan (umuna) ti ginettan a bilagot (iti benneg ti nateng); naim-imas (maikadua) met ti bistek Ilokano (iti benneg ti karne). Ket ti resultana, Overall Champion ni Kagawad Manding.
Saan ketdi a nakakaskasdaaw ti laing ni Kagawad Manding nga agluto. Agkoskosinero kadagiti padaya iti buniag, kanaganan, kasar, minatayan, ken dadduma pay nga okasion. Nangrugi a “maestro kosinero” idi agtawen iti 18. Nasursurona ti agluto gapu iti panangpalpaliiw ken pannakimitmitirna kadagiti lallakay (natayda aminen) a kosinero iti lugarda a kas kada Appo Benjamin Jorge, Ambrosio Anselmo, ken Tony “Basi” Asis. Idi un-unana, awan bayad no agkosinero kadagiti kapurokanna ta kas kunana: “Biang la ti agkakaarruba.”
Ti mula a bilagot wenno pikaw. (Pammadayaw ni Roy V. Aragon)
”Ngem kadagitoyen nga uso ti catering service, mabayadan met aminen,” insakuntipna.
No agkosinero ita, para laengen kadagiti babassit nga okasion ti pampamilia wenno kadagiti programa ti eskuela wenno training dagiti nadumaduma a gunglo.
Maysa laeng ti ginettaan a bilagot kadagiti specialty ni Kagawad Manding. Ngem no agsaludsodka kadagiti mannakidaya ditoy Piddig, nataengan man wenno ubbing, kunada: “Basta luto ni Manding, naimas amin!”–O
(Adda kadi met maipadamagyo nga imasenyo a masida/makan/mainum iti napananyo a panganan a mabalinyo nga irekomendar a padasen met a ramanan dagiti naimas ti kakaananna a readers ti Bannawag? Ipatulod iti daytoy iti baro a seksion a “Nagimasen, Abalayan!” iti: [email protected]. –Editor)
(Bannawag, Oktubre 16-31, 2024)
