IDI makitak ni Ading Alvin Savella iti internet, anian a siddaawko. Diak impagarup a maysa gayam nga international chef ken nalatak iti awagna a “The Kitchen Assassin.”
Wen, kasla diak mamati. Saan met ngamin nga is-istoriaen ni antik (Rose Rambaud-Savella) uray idi umay sumarsarungkar iti bariomi (Puritac, Pinili, Ilocos Norte a nakayanakanna). Agindeg ni Anti Rose iti Maui, Hawaii, kaduana ti pamiliana.
Uray idi kakaisuna a simmarungkar ni Alvin iti nakayanakan ni nanangna, awan met inis-istoriana.
Ni Alvin Savella, “The Kitchen Assassin.”
BROADCAST MEDIA: Asino ni Shalimar?
Nupay kasta, di met ketdi unay nakakaskasdaaw no apay a nalaing a kosinero ni Alvin. Daydi Lilo Anong (Mariano nga ama ni nanangna), maysa met kadagiti nalaing a kosinero kadagiti pasken a kas kadagiti padaya iti kasar wenno no adda natay idi adda pay ditoy bariomi. Napan nagindeg ni Lilo Anong idiay Hawaii, kaduana ti asawana, ket isuda ti nangay-aywan ken ni Alvin ken iti kakaisuna a kabsatna a lalaki a ni Justin idi ubbingda pay.
Ngarud, nag-level up iti napalalo ni Alvin! Sabalin a padaya ti ilutlutuanna!
Idi nasapa a paset ti tawen 2023, iti umuna a gundaway, siraragsak ni Anti Rose a nangipadamag a nanglukat ni Alvin iti bukodna a restaurant iti business center ti Lahaina, iti asideg ti baybay. Pinanagananna iti Duckine. Ngem anian ta napasamak ti dakkel a puor iti Maui idi Agosto iti dayta a tawen ket nupay di nairaman a nauram ti Duckine, kapilitan a naiserra daytoy.
Inyam-ammo ni Alvin ti panagaramat iti tweezer kadagiti padana a chef iti Maui. (Rolland & Jessica)
Ngem itay laeng nabiit, siraragsak manen ni ikit a nangipadamag nga iti panagungar manen ti ekonomia ti Maui, naluktan manen ti Duckine-- ngem binaliwanen ni Alvin ti naganna iti Cocodeck.
Naipasngay ken dimmakkel ni Alvin iti Lahaina, Hawaii. Napan nagbasa iti maysa a culinary school iti Southern California. Kalpasanna, nagtrabaho iti Los Angeles iti 10 a tawen ket idi 2012, nagsubli iti Maui. Nagpaay a chef de cuisine (maestro kosinero) iti The Banyan Tree iti Ritz Carlton iti Kapalua sa iti di nagbayag, kas chef de cuisine iti Humuhumunukunukuapua’a ti Grand Wailea. Idi 2020, nadutokan ni Alvin nga executive chef ti West Maui restaurant group a pakairamanan ti Mala Ocean Tavern, Down the Hatch, ken ti Breakwall Shave Ice Co.
Kasano met ti estilo ni Alvin nga agluto?
“Sagpaminsan, kayatko a masorpresa dagiti ilutuak,” kinunana. A pagaayat kano met dagiti kustomerda. “Ken ti panagramanko, naimpluensiaan iti panagraman dagiti adda iti Pasipiko—ken iti panagraman dagiti Filipino.”
Pinili ni Alvin ti nagan a “The Kitchen Assassin” iti pannakilablabanna kadagiti internasional a salip iti panagluto—a nangab-abakanna met. Maysa pay, kasla “assassin” ta kaay-ayona ti agurnong kadagiti nadumaduma a kutsilio a mausar iti panagluto.
Kadua ni Alvin iti ladawan dagiti dadakkelna, da Abe Savella ti Cabugao, I.S., ken dati a Rose Rambaud ti Pinili, I.N. (Facebook)
Ngem maysa kadagiti pakabigbiganna a kas chef ti panagusarna iti tweezer a pagpidutna kadagiti yerba (herbs) a maaramat a kas dekorasion ken pangpaimas kadagiti lutuenna a potahe.
Kunana nga awan idi ti agus-usar iti tweezer kadagiti padana a chef iti Maui ngem idi makitada nga agus-usar iti kastoy, tinuladda metten.
Sinaludsodko ken ni Anti Rose no asino ti aglutluto iti balayda no adda ni Alvin.
“Kaaduanna a siak, a!” inkatawa ni Anti Rose. “Wen, mamatika. Ta uray pagsidaek ni Alvin iti inabraw a bulong ti marunggay a nalaokan iti sabong ti karabasa, wenno uray kamangeg koma a nalaokan iti naganus a bunga ti singkamas, no adda, imasenna latta. Pinadakkelko dagiti annakko a pudpudno nga Ilokano.”—O
(Bannawag, Nobiembre 1-15, 2024)
