Gapu ta manamnama a suroten ni Bagyo Nika ti dinalanan ni Bagyo Marce, mabalin nga agpeggad manen dagiti 2,500 a barangay iti Ilocos Region (Region 1), Cagayan Valley (Region 2), ken Cordillera Administrative Region (CAR) a binegbeg ti napigsa a tudo ken angin itay napan a lawas.
Malaksid iti dayta, dua pay a dawel ti panawen ti mabalin a mabukel a bagyo agingga inton umay a lawas, ket agturong met laeng dagitoy iti Northern Luzon.
Daytoy ti impakdaar ni Sekretario ti Department of the Interior and Local Government (DILG) Juanito Victor “Jonvic” Remulla iti press conference a naangay iti National Disaster Risk Reduction and Management Council (NDRRMC) Operations Center iti Camp Aguinaldo, Siudad ti Quezon idi Nobiembre 10.
Kinuna ni Remulla a nakaisaganan ti Department of Social Welfare and Development (DSWD) iti 250,000 a food packs a maiwaras kadagiti maapektaran ti Bagyo Nika.
Agdagup iti 1.3 a milion a family food packs ti naidulin iti bodega ti DSWD ken sisasagana met ti PhP115 a milion a pondo para iti panagresponde.
Bise Mayor ti Reina Mercedes, naidarum iti sedition, rebellion
Napakaammuan metten dagiti kameng ti Armed Forces of the Philippines (AFP) ken ti Philippine National Police (PNP) nga isaganada dagiti luganda a para iti daga, taaw, ken tangatang para iti posible a pannakausar dagitoy para iti relief operation. Sisasaganan ti dua a C-130, uppat a Black Hawk helicopter, ken tallo a Bell chopper ti AFP, kasta met ti lima a helikopter ti PNP.
Innayon ni Remulla a naibilinen ti inkapilitan a panagbakuit kadagiti barangay a matupar ni Nika mangrugi iti rabii ti Domingo. (Martin Sadongdong/Manila Bulletin//Lito Hilidon/Bannawag)
