Nasurok a 8,000 a katao ti nasaksakbay a nayadayo iti Luzon gapu iti napigsa a tudo ken angin nga inyeg ni Bagyo Nika, segun kadagiti opisial ita, Nobiembre 11.
Inangay ti Office of Civil Defense (OCD) ti taripnong ti Inter-Agency Coordinating Council (IACC) nga indauluan ni Sekretario ti Department of the Interior and Local Government (DILG) Juanito Victor (Jonvic) Remulla iti Camp Aguinaldo, Siudad ti Quezon tapno makoordinar ti panagrespondeda iti bagyo ken mabalabala dagiti aramidenda para iti manamnama nga epekto ti dua pay a bagyo nga umasideg iti Philippine Area of Responsibility (PAR).
Naipakaammo iti taripnong a nagdisso ni Nika iti Dilasag, Aurora iti Central Luzon (Region 3) itay 8:00 ti agsapa ket manamnama a kumapuy daytoy bayat a tuparenna ti kadaklan a Luzon.
Itay 2:00 ti malem, addan ni Nika iti ikub ti Lagawe, Ifugao.
Listaan dagiti nakapasa iti 2024 Philippine Bar Examination
Kinuna ni Regional Director ti OCD-3 Amador Corpus a napigsa a tudo ti nasagrap ti Dilasag ken Casiguran iti probinsia ti Aurora, nga adda iti Tropical Cyclone Wind Signal Number 4.
Segun ken ni Corpus, linuktanda ti 69 nga evacuation center iti nadumaduma nga ili ken addan 1,283 a pamilia (wenno 3,660 a katao) ti naapektaran. Nasaksakbay a naipanawdan idinto nga adda pay laeng ti dadduma iti pagbakuitan sipud idi nangrugi da Bagyo Kristine, Leon, ken Marce.
Iti Cagayan Valley (Region 2), agdagup iti 1,564 a pamilia (wenno 4,561 a katao) ti nasaksakbay a naipan kadagiti pagbakuitan kadagiti uppat a probinsia - Isabela, Cagayan, Nueva Vizcaya ken Quirino.
Kiniddaw ni Regional Director ti OCD-2 Leon Rafael kadagiti agindeg iti Cagayan Valley a saanda koma nga agbaybay-a ta agsasaruno a bagyo ti immay isu a nalukneng ti daga a mabalin pagtaudan ti panagreggaay ti daga iti napigsa ti tudo.
Binilin ni Remulla dagiti regional director ti OCD a palagipanda dagiti local chief executive nga agsagana iti kasapulan a panagbakuit dagiti iturayanda. (Martin Sadongdong/Manila Bulletin//Lito Hilidon/Bannawag)
