Nangiruar ti China itay ngudo ti napalabas a lawas iti maysa a mapa ti Panatag Shoal (am-ammo iti China a Huangyan Dao) nga addaan iti baseline kalpasan ti panangipasa ti gobierno ti Filipinas iti dua a linteg a mangpasingked iti panagtagikuana iti daytoy.
Kinuna ti Foreign Ministry ti China idi Domingo, Nobiembre 10, a nangiruarda iti mapa a nangideklarar kadagiti pagibasaran a linia iti teritorioda iti taaw a kabangibang ti Panatag “kas gagangay nga addang ti gobierno ti China.”
Ti tignay, kinuna ti ministry, ket naaramid tapno mapatibker, babaen ti linteg, ti “panangtarawidwidna iti baybay” ken maitunos daytoy iti internasional a linteg ken naipagagangayen nga aramid.”
Mayalubog met kano daytoy iti United Nations Convention on the Law of the Sea (UNCLOS) ken iti linteg ti Beijing maipapan iti “territorial sea and contiguous zone.”
Gakat a mangipalubos nga agtrabaho dagiti Senior Citizen, inanamongan ti Kamara
Nupay kasta, daytoy a panangiruar ti China iti mapa ti Panatag nga addaan iti baseline, naaramid kalpasan a pinirmaan ni Presidente Marcos ket nagbalin a linteg ti Philippine Maritime Zones Act ken Philippines Archipelagic Sea Lanes Act a nangpasingked iti sovereign rights ti pagilian iti masakupanna a taaw agraman ti sakupna nga exclusive economic zone (EEZ), a ti dadduma a pasetna, ibagbaga ti China a kukuana.
Kinuna ti National Mapping and Resource Information Authority (Namria) a mangiparuarto met iti baro a mapa ti Filipinas a pakairamanan ti hurisdiksion ti pagilian iti bukodna nga EEZ, ti West Philippine Sea.
Ti saan a napagnunumuan a “ten-dash line” ti pangibatbatayan ti China iti panangtagikuana Panatag Shoal idinto nga agbasbasar ti Filipinas iti UNCLOS ken pinasingkedan daytoy ti 2016 Arbitral Ruling on the South China Sea.
Para iti China, ti inaramid ni Presidente Marcos ket maysa nga addang a pangpatiber iti maipagarup nga illegal nga arbitral ruling babaen ti domestic law.
Kuna ti China a saanda a kanunongan daytoy tignay a "nakaro a pananglabsing iti territorial sovereignty ti China ken dagiti karbengan ken interesna iti South China Sea."
(Joseph Pedrajas/Manila Bulletin//Juan Asuncion/Bannawag)
