NUPAY adda darana nga Amerikano, ibilbilang latta ni Jojo McClintock Clemente ti bagina a puro nga Ilokano.
Nayanak ni Jojo idi Hunio 16, 1979 iti Barangay Gabu Norte iti Siudad ti Laoag. Nangala iti Electronics and Communications Engineering iti Mariano Marcos State University, ngem dina nalpas ta simreken iti media idi adda pay laeng iti maikatlo a tawenna iti kolehio.
Di malipatan ni Jojo no kasano a nabukel ti arapaapna nga agbalin a broadcaster.
Isuna kano ngamin ti para dalus iti paraanganda idi ubing. No manarimaan ti panagkaykaykayna, mangmangngegna dagiti Ilokano a programa a maipatpatayab iti radio iti kaarrubada. Ket dita a nangrugi ti panagduyosna iti media—masansan pay a tuladtuladenna dagiti announcer bayat iti panagkaykaykayna.
Ilegal a pannakaiserrek iti Filipinas dagiti agrikultural a produkto, siiiget a pabantayan ni Marcos
Tawen 1998 idi nakastrek ni Jojo a trainee iti GMA Campus Radio. Nupay FM Station daytoy, ken dina maipakat dagiti nasursurona nga Ilokano a panagirakurak bayat ti panagkaykaykayna, dina inidian ti gundaway a makastrek iti media.
Kalpasan ti sumagmamano a bulan, naala met a trainee iti DWHP Smile Radio. Siam a bulan a nag-trainee ditoy sakbay a nagbalin a regular nga empleado a nakadutokanna pay a kas acting program director.
Tawen 2003 idi inawis ti ABS-CBN nga agbalin a DJ iti FM Station-da iti Ilocos Norte. Ket iti panagtrabahona iti ABS-CBN, nagbalin a production chief ken radio department head iti nasao nga estasion.
Naginana ni Jojo iti media idi 2011—nagtrabaho a kas customer service supervisor, product campaign manager ken trainer iti maysa a call center company nga adda sangana iti Ilocos Norte ken iti Pampanga.
Ngem nagsubli met laeng iti media idi 2018 ta simrek a volunteer DJ iti Magik FM Laoag a nakabirngasanna iti ”Uncle Jo” kadagiti programana. Ket gapu iti gaget ken laing nga impakitana, nadutokan nga station manager idi 2019.
Kaaduan nga FM Station, Taglish ti us-usaren dagiti DJ-da. Ngem gapu iti panagayat unay ni Jojo iti Ilokano, nangipan kadagiti Ilokano DJ ken Ilokano a programa iti Magik FM Laoag. Isu nga iti tunggal malem, dua ket guduat’ oras a deretso nga agpatpatokarda kadagiti Ilokano a kankanta.
Adda nagsayaatan daytoy a desision ni Uncle Jo. Ta sipud idi naipakat daytoy iti programming-da, dimmakkel ti listenership-da; ken di mailibak nga immadu pay dagiti advertiser-da.
Malaksid laeng iti balligi a sagsagrapen ita ni Jojo iti media, rumusrusing payen ti napintas a gasatna iti panagnegosio. Iti mabiit, addan maipasdek a KTV Bar-na iti sentro ti Siudad ti Laoag. Siempre, karamanto dagiti kankanta nga Ilokano kadagiti mabalin a kantaen dagiti kustomer.
Segun kenkuana, masansan a makais-isem no malagipna dagidi aldaw nga agkaykaykay iti paraanganda. Dagiti kanito a nakabuklan ti arapaapna—arapaap a nangirangtay iti balligi iti biagna.—O
(Bannawag, Septiembre 16-30, 2024)
