SIUDAD TI VIGAN, Ilocos Sur – Nasapulanen dagiti rescuers idi Domingo ti bangkay ti maysa a fish vendor a nalmes iti Abra River iti batog ti Barangay San Mariano, Bantay, Ilocos Sur idi Biernes.
Nalmes ti biktima a ni Mary Anne Daria, 47, kalpasan a nabaliktad ti rakit a naglugananna a kaduana ti asawa ken anakna gapu iti napigsa nga agus ti karayan a pinataud ti bagyo “Marce.”
Natengngel ti anak ni Daria ti rakit ken naisalakanna ti amana ngem nagpukaw ti inana iti danum, kas kinuna ni Rhon Arquelada, pangulo ti Ilocos Sur Provincial Disaster Risk Reduction Management Office.
Iti sabali a bangir, nalmes ti maysa a 21-anios a lalaki bayat ti kaaddana iti karayan iti Barangay Mapuroc, San Mateo, Isabela idi Domingo.
Cauplasan Bridge iti Ilocos Norte, agtalinaed a nakaserra agingga iti Enero 2025
Binigbig dagiti polis ti biktima a ni Christian Columbino, residente ti Barangay San Roque, San Mateo.
Kuna ti polisia nga agkalkalap ti biktima iti karayan a kaduana ti kasinsinna iti alas-10 iti bigat idi inkeddengna ti aglangoylangoy. Nupay kasta, ginuyod ti napigsa nga agus ti karayan a gapu ti nakalmesan daytoy. (Freddie Lazaro/Manila Bulletin)
