Impasigurado ni Presidente Ferdinand Marcos Jr. (PBBM) nga adda umdas a calamity fund, agraman dagiti maiwaras a tulong para iti bagyo agingga iti arinunos ti tawen, segun ken ni Sekretario ti Presidential Communications Office (PCO) Cesar Chavez ita nga aldaw, Nobiembre 11.
Nupay gagangay a maibus ti calamity fund no dumteng ti Septiembre agingga Oktubre gapu ta panawen ti bagyo, dinakamat ni Chavez ti impasigurado ti Department of Budget and Management (DBM) iti maysa nga interbiu nga adda pangalaan ti gobierno iti pondo nga agpaay iti calamity fund.
Itay Nobiembre 10, personal nga inyawat ti Presidente ti agarup PHP80 a milion a balor ti tulong pinansial kadagit walo a lugar iti Buguey, Cagayan, a nakaro nga inapektaran ni Bagyo Marce (internasional a nagan: Yinxing).
Indauluan met ni Presidente Marcos ti pannakaiwaras ti 1,500 a food packs manipud iti Department of Social Welfare and Development (DSWD), ken PhP866.3 a milion a balor ti tulong iti agrikultura manipud iti Department of Agriculture (DA).
Listaan dagiti nakapasa iti 2024 Philippine Bar Examination
Maibatay iti datos ti National Disaster Risk Reduction and Management Council (NDRRMC), maysa a tao ti natay ken 261,787 a katao (wenno 76,622 a pamilia) ti naapektaran gapu iti Bagyo Marce. (Raymund Antonio/Manila Bulletin//Lito Hilidon/Bannawag)
