“MR. TALDIAP!” Dayta man ti awag ti adu a makaam-ammo kenkuana gapu iti kinalatak ti programana iti radio a ”Taldiap iti Nagrupsan a Kalman.”
Nabukel ti bosesna, ket no agibasa iti daniw wenno pakasaritaan ti biag nga ipatulod dagiti adu nga agdengdengngeg kenkuana, pudno a maguyugoyka a dumngeg.
Isu daytoy ni Apo Rodrigo ”Rod” Sadian. Nangrugi iti DZEA Catholic Media Network (Siudad ti Laoag) a nagkaduaanda iti nalatak met nga anawnser iti radio, ni Apo Leonard Villa.
Kinapudnona, ni Apo Villa ti nangirugi iti ”Taldiap iti Nagrupsan a Kalman” ngem idi insardengna daytoy, sinublat ni Uncle Rod, kas awagmi kenkuana, ti programa ti gayyemna.
BROADCAST MEDIA: Asino ni Shalimar?
”Masayanganak ngamin idi a mapukaw daytoy a programa,” kinunana.
Husto ti pattapattana a dakkel ti potensial daytoy ”Taldiap” kas paneknekan ti kaadu dagiti agsangpet a surat maipanggep iti ayat, padas iti biag, salaysay, ken daniw.
Manipud iti DZEA, nagtrabaho pay ni Uncle Rod iti DWFB, DWIZ, ken iti ABS-CBN Laoag malaksid pay a nag-Voice Over Talent ken correspondent ti dati a CNN Philippines. Naibbatanna ti “Taldiap” ngem idi immakaren iti RPN DZRL Radyo Ronda Batac, a pagpaayanna nga station manager, biniagna manen ti ”Taldiap” – ket agingga ita, maipatpatangatang pay laeng daytoy nalatak a programa (iti tunggal Sabado, manipud iti ala una agingga iti alas tres iti malem).
Tubo ti Salbang, Paoay, Ilocos Norte, ni Uncle Rod. Kaingungotna ni dati a Marie Christy Lorela Garcia ti Batac City, maysa a negosiante. Annakda da Jerome Rodney, Nurse II iti MMMHMC, Batac City; Dean Rodman, negosiante; Harold, graduado iti HRM,; Howard, rehistrado a nurse; ken Rocky Ian, 3rd year iti Mechanical Engineering iti MMSU, Batac City.
Malaksid iti “Taldiap,” iggem pay ni Uncle Rod ti “Ronda Balita.”
Kas makipagili iti ruar ti radio, nagpaay pay a presidente ti Parent-Teachers Association iti agpang probinsial.
Iti akemna a kas mangimaton iti RPN DZRL, kinunana nga iti panagipatangatang iti impormasion, awan ti kasamayan nga estratehia no di ti panagsadag iti kinapudno.—O
(Bannawag, Hulio 1-15, 2024)
