Napardas a pimmigsa ni Bagyo Ofel ket nagbalinen daytoy a "Super Typhoon," isu naibayog iti Signal No. 5 gapu iti posible a nakaro nga epektona iti sumarsaruno nga oras, segun iti Philippine Atmospheric, Geophysical and Astronomical Services Administration (PAGASA).
Iti pakaammo ti PAGASA itay 8:00 ti agsapa ti Nobiembre 14, addaan ni Ofel iti kapigsa a 185 a kilometro tunggal oras iti asideg ti sentrona, ken pugso a 230 a kilometro tunggal oras. Dati a gagangay a bagyo ni Ofel nga addaan iti kapigsa a 165 a kilometro tunggal oras ken pugso a 205 a kilometro tunggal oras.
Itay 7:00 ti agsapa, nasaripatpatan ni Super Bagyo Ofel iti 165 a kilometro iti daya-abagatan a daya ti Siudad ti Tuguegarao, Cagayan.
Bayat nga umas-asideg ni Ofel, naibayog ti Tropical Cyclone Wind Signal (TCWS) no. 5 iti amianan a daya a paset ti Cagayan (Santa Ana, Gonzaga).
Sinao ni BP Duterte a panangpapatay iti First Couple, ibilang ti Malakanyang a serioso a banag
Adda iti TCWS No. 4 dagiti lugar iti abagatan a daya a paset ti Babuyan Islands (Camiguin Island), amianan ken daya a paset ti kadaklan a Cagayan (Santa Teresita, Ballesteros, Aparri, Camalaniugan, Buguey, Lal-Lo, Allacapan, Gattaran, Baggao, Peñablanca) ken amianan a daya a paset ti Isabela (Maconacon, Divilacan, Palanan).
Naipan iti TCWS No. 3 ti Batanes, laud ken abagatan a daya a paset ti Isabela (San Pablo, Delfin Albano, Ilagan City, Tumauini, Cabagan, Santa Maria, Santo Tomas, San Mariano, Dinapigue), amianan a paset ti Apayao (Flora, Santa Marcela, Luna, Pudtol, Calanasan, Kabugao), ken amianan a paset ti Ilocos Norte (Pagudpud, Adams, Dumalneg).
Adda iti TCWS No. 2 ti Batanes, laud ken abagatan a paset ti Isabela (Quezon, Quirino, Mallig, San Manuel, Aurora, Cabatuan, City of Cauayan, Benito Soliven, Naguilian, Gamu, Burgos, Reina Mercedes, Luna, Roxas, Angadanan, Alicia, San Guillermo, Echague, Jones, San Agustin, San Mateo, San Isidro), amianan a daya a paset ti Quirino (Maddela), dadduma a paset ti Apayao, Kalinga, amianan a daya a paset ti Abra (Tineg, Lacub, Malibcong, Lagayan, San Juan, Lagangilang, Licuan-Baay, Daguioman), daya a paset ti Mountain Province (Paracelis), daya a paset ti Ifugao (Alfonso Lista), dadduma a paset ti Ilocos Norte ken Aurora (Dilasag).
Adda iti TCWS No. 1 ti dadduma a paset ti Isabela, dadduma a paset ti Quirino, Nueva Vizcaya, dadduma a paset ti Mountain Province, dadduma a paset ti Ifugao, dadduma a paset ti Abra, amianan a paset ti Benguet (Bokod, Mankayan, Kapangan, Atok, Kabayan, Kibungan, Bakun, Buguias, Tublay), Ilocos Sur, amianan a paset ti La Union (Luna, Sudipen, Bangar, Santol, San Gabriel, Bagulin, Bacnotan, Balaoan, San Juan), ken amianan ken sentro ti Aurora (Casiguran, Dinalungan, Dipaculao, Maria Aurora, Baler, San Luis).
Agpaamianan a laud ni Ofel iti Philippine Sea sakbay nga agdisso iti daya a baybay ti Cagayan wenno amianan a paset ti Isabela inton Huebes ti malem. (Ellalyn De Vera-Ruiz/Manila Bulletin//Lito Hilidon/Bannawag)
