Impakdaar ti chairman ti Committee on Communications Technology ti Kamara kadagiti Filipino a saanda koma a paallilaw kadagiti makunkuna a "love scams" nga agraraira pay laeng iti pagilian.
Binalakadan ni Diputado ti Navotas City lone district Toby Tiangco itay Huebes (Nob. 14) dagiti Filipino a dida koma agtaltalek a dagus kadagiti kastoy a modus.
Dinakamat ni Tiangco ti panagadal ti global information and insights company a mangipakpakita nga iti umuna nga innem a bulan ti tawen, 18 a porsiento kadagiti mapapati a digital fraud iti sektor dagiti komunidad – kas kadagiti online forum ken dating sites – ti naggapu iti Filipinas.
Kinuna ni Tiangco a puntiria dagiti scammer uray dagiti personal ken kangrunaan a tarigagay ti tao – ti maayat ken maaddaan iti nasinged a relasion, isu a masapul a masalakniban dagiti Filipino manipud iti pinansial, emosional, ken sikolohikal a pannakadangran a patauden dagiti manangallilaw.
Kiddaw ni Quiboloy a Medical Furlough, inanamongan ti Pasig RTC
Segun iti Cybercrime Investigation and Coordinating Center (CICC), gundawayan dagiti love scam dagiti biktimada babaen ti panangparnuayda kadagiti peke a pakabigbigan tapno maalada ti panagtalek daytoy, sa usarenda ti ilusion a relasion a mangmanipular, mangkikil, wenno mangtakaw kadakuada.
Pinalagipanda ti pubilko nga agridam kadagiti kakastoy a modus ken ipulongda dagiti mapagduaduaan a mensahe ken aramid iti anti-scam hotline: 1326. (Ellson Quismorio/Manila Bulletin//Lito Hilidon/Bannawag)
