Mabalin nga agpatingga ti nabiit pay a nagsasaruno nga ingingina ti lana gapu iti pakaammo dagiti analista ti industria a pannakaipababa uray bassit laeng ti presio dagiti fuel products iti umay a lawas.
Maibasar iti umuna nga uppat nga aldaw a trading iti Means of Platt Singapore (MOPS) ken maibatay iti agdama a foreign exchange rates, mapattapatta a bumaba ti presio ti gasolina iti P0.75 agingga iti P0.95 ti tunggal litro. Manamnama met a bumaba ti presio ti diesel iti P0.70 agingga iti P0.90 ti tunggal litro.
Mainaig daytoy a potensial a rollback iti pannakaikabassit ti panagkasapulan ti sangalubongan iti fuel producs, segun ken ni Jetti Petroleum President Leo Bellas. Nupay kasta, ti limitado a suplay ti diesel ken gasolina manipud iti China ti manglaplapped iti dakdakkel koma pay a maikissay iti presio.
Ti bimmassit nga eksport ti China, a mangsupsuplay iti adu a pagilian iti Abagatan a daya nga Asia, ket nangpataud iti price floor, a manglimitar iti potensial a panagbaba ti presio iti laksid ti pannakaikabassit ti fuel products a kasapulan ti sangalubongan.
Panagusar iti social media kadagiti pagbaludan, imparit ti BuCor
Kabayatanna, sangsanguen ti Organization of the Petroleum Exporting Countries (OPEC+) dagiti karit iti panangtarawidwid iti suplay ken presio ti lana. Maigapu daytoy iti dimmakkel a produksion manipud kadagiti dadduma a kameng a pagilian, iti laksid dagiti naiplano a pannakakissay ti produksion, ken iti basbassit ngem iti ninamnama a pannakaidakkel ti panagkasapulan ti China iti fuel products bayat ti kalgaw.
Kuna ti OilPrice.com a mabalin nga impluensiaan ti resulta ti kalkalpas a U.S. presidential election dagiti plano ti OPEC+ a mangipad-eng pay laeng iti pannakaikabassit ti maikissay iti produksionda a lana.
“Ita, kas iti plano ti OPEC+ nga ikabassitda ti pannakakissay ti produksion mangrugi iti Enero 2025, adda baro a di mapakpakadaan a banag – ti president-elect ti U.S., a dagiti tignayna ket mabalin nga ad-adda a mangdadael iti kinatalged ti merkado,” kinuna ti OilPrice.com.
Patien dagiti analista a dagiti pagalagadan ti sumaruno nga administrasion ti Amerika ket mabalin nga agtungpal iti naing-inget a panangdusa ti Amerika iti Iran, maysa a kameng ti OPEC a saan a nangkissay iti produksion wenno patpataudenna a lana. Mabalin a maksayan ti lana a mailako ti Iran, nga idi rugrugi daytoy a tawen, nadanon ti Iran ti kadakkelan nga eksportna iti lana iti uneg ti 6 a tawen.
"Posible a naing-inget pay ita ti panangdusa ti president-elect ti U.S. iti Iran a mangapektar kadagiti eksport ti Iran. Ti pannakakissay ti suplay ti lana gapu iti saan a pannakailako ti Iran iti produksionna a lana, agtungpal la ketdi iti nangatngato a presio ti lana,” inlawlawag ti OilPrice.com. (Gabriell Christel Galang/ Manila Bulletin)
