Iti panangdakamatna a sisasango ita ti lubong agraman ti Filipinas iti nakaro unay a panagsisina iti pammati, politika, agraman dagiti panagduduma iti kultura ken kapanunotan dagiti nagduduma a henerasion, kiniddaw ni Presidente Marcos kadagiti lider ti gimong nga agsadagda koma iti nadiosan a sirib ken tapno agbangonda kadagiti rangtay iti yan dagiti pagsusupadian.
Iti panangidaulo ni Marcos iti maika-49 a Philippine National Prayer Breakfast iti Palasio ti Malakanyang itoy a Lunes, Nobiembre, 18, pinaregtana dagiti lider manipud kadagiti nadumaduma a sektor ti gimong a mangpabaro iti panagkumitda iti serbisio a naigiya iti pammati.
"Ita nga aldaw, mangipaayak iti awis a mangikumit manen: Agkumit manen iti pagrebbengan nga agserbi a nabuyogan iti pammati, a sadiay dagiti pangngeddeng ket maaramid a saan a dinarasudos no di ket mabuyogan iti pannakaawat babaen ti kararag," kinuna ni Marcos kadagiti padana a lider.
Panagusar iti social media kadagiti pagbaludan, imparit ti BuCor
"Pabaruentayo ti karitayo a mangsapul iti nadiosan a sirib, mangbangon kadagiti rangtay no sadino nga adda dagiti pannakabingaybingay, ken mangipangulo nga addaan iti panagikumit a dagiti kasasayaatan nga aldaw ti pagiliantayo ket adda iti sanguanantayo," innayonna.
BBM_National_Prayer_Breakfast_27239c29d8
(Ladawan: Pammadayaw ti Malakanyang)
Indagadag ti Presidente kadagiti agdama a lider a mangibati iti tawid a mangipatpateg iti kinatarnaw imbes a ti kinapraktikal, sirmata a saan ket a dagiti gunggona nga agpaut iti ababa a panawen, ken panagtutunos imbes a panagsayyasayya. Inawaganna ida a siguraduenda nga "iti tunggal pangngeddeng, iti tunggal aramid, adda ti espiritu ti ayat, asi, ken kinapakumbaba."
Pinaregtana pay dagiti lider iti masakbayan a bay-anda a ti pammati ti mangiwanwan kadakuada iti panangidaulo, a makagun-od iti tured manipud iti dayta kadagiti panawen ti panagduadua, ken mangtimon kadagiti ambisionda para kadagiti panggep a dakdakkel ngem iti bagida.
Napaliiw ni Marcos a dimteng ti national prayer breakfast iti napateg a panawen bayat a naipasango dagiti Filipino kadagiti nakaro a karit a nangrugi iti Severe Tropical Storm Kristine a nangsaplit iti pagilian idi Oktubre 21.
“Ti kolektibo a pammati ken kararagtayo iti Mannakabalin-amin ti kabibilgan a ramit a masapultayo a mangdaer kadagitoy a bagyo ken ti pannakadadael a yegda. Ket ngarud, buyogan ti panagyaman ken determinasion a mangipatungpal kadagiti panggeptayo, makikaduaak ngarud iti daytoy Philippine National Prayer Breakfast wenno PNPB,” kinunana.
Kinuna ti Presidente nga agserbi ti koma daytoy a pasamak a kas palagip a “ti panangidaulo nga awanan pammati ket kasla barko nga awanan iti kompas: mabalin nga aglayag, ngem agkatangkatang,” a nangipaganetget a ti pudno a panangidaulo —ti panggep a mangbalbaliw iti biag dagiti tattao para iti nasaysayaat— ket iwanwan koma ti sirib ken nairamut iti pammati iti Dios.
“Iti dandani kagudua ti siglo, nagtalinaed daytoy a panagtitipon a kas pammaneknek iti bileg ti pammati—maysa a mangpukaw kadagiti pagbebedngan, mangigalut kadatayo iti namnama, ken agserbi nga agpada a kas kompas ken angkla iti panangidaulo,” kinuna ni Marcos.
“Iti daytoy a panagtitipontayo, matakuatantayo manen ti tured nga agtignay a desidido, ti kinapakumbaba a dumngeg a sipapasnek, ken ti determinasion a mangbangon iti nasion a mangipakita iti kasasayaatan ti kinaasinotayo,” innayonna.
Kinuna ti Chief Executive a ti sirmata ti national prayer breakfast ket maysa nga awag kadagiti lider a mangsirarat iti labes ti agdama ken agtarigagay para iti kinalinteg ken iti mangitag-ay iti kinatao.
Ad-adda pay a napaliiwna a nagbalinen a bato a panuli ti nasional a panagmennamenna – kanito a pangilaksidan dagiti lider kadagiti titulo ken bukodda a panggep tapno agtitiponda a kas agpapada iti tiempo ti panagkararag. (Betheena Unite/ Manila Bulletin)
