Gapu iti umad-adu a bilang ti kaso ti dengue iti pagilian, impakaammo ti Philippine Health Insurance Corporation (PhilHealth) a manipud iti PhP16,000 nagbalinen nga PhP47,000 ti balor ti benepisio para iti panangagas iti dengue, mangrugi ita a bulan.
Inlawlawag ti PhilHealth a ti pannakaipangato ti benepisio a nangrugi idi Nobiembre 1, ket paset ti agtultuloy a panangikagumaanan ti PhilHealth a mangpasayaat kadagiti benepisio tapno makaipaay iti umdas a pinansial a salaknib kadagiti Filipino a naapektaran iti sakit.
Sakbay daytoy, naipangaton ti PhilHealth ti benefit package para iti dengue, adda wenno awan ti sintomana, manipud PhP10,000 ket nagbalinen a PhP13,000.
Segun iti datos ti Department of Health (DOH), adda 269,467 a kaso ti dengue a nailanad iti entero a pagilian, ket ti National Capital Region (NCR) ti nakagteng iti alert level gapu iti nailanad a 24,232 a kaso ti dengue.
Kiddaw ni Quiboloy a Medical Furlough, inanamongan ti Pasig RTC
Impalagip ti PhilHealth iti publiko a dagiti pasiente a maipapaayan iti serbisio iti labes ti minimum care standard kadagiti non-ward accommodations, kasta met dagiti kanayonan a serbisio a saan a mainaig iti panangagas iti dengue kadagiti accredited a pribado a pagagasan, ket adda masapul a bayadan. (Merlina Hernando-Malipot/Manila Bulletin//Lito Hilidon/Bannawag)
