BANGUED, Abra – Dinutokan ti Department of the Interior and Local Government ni senior provincial board member Russell Bragas kas acting vice governor kalpasan ti pinal a pangngeddeng ti Opisina ti Presidente (OP) a nangsuspende ken ni Vice Gov. Maria Jocelyn Valera-Bernos iti 18 a bulan.
Naawat ni Bragas ti designasionna idi Biernes, Nobiembre 15, manipud ken ni DILG Secretary Juanito Victor C. Remulla babaen ken ni DILG-Cordillera Regional Director Araceli A. San Juan.
Imbilin ni Remulla ken ni Bragas nga agtakem iti puesto “tapno malapdan ti pannakaparalisa ti operasion ti gobierno lokal” babaen ti DILG Memorandum Circular 2019-21 a nangilanad kadagiti operational guidelines a nasken iti pannakapataray ti lokal a gobierno.
Sinuspende ti Office of the Deputy Executive Secretary for Legal Affairs ti Opisina ti Presidente ni Bernos kalpasan a naduktalan a nagbasol iti di umno a panangtrato, panangabuso iti turay, aramid a saan a mainumo iti maysa nga opisial publiko, ken panagsukir kadagiti pagalagadan ti gobierno nasional a nagtaud iti reklamo a naipila idi Disiembre 2020 bayat ti kangitingitan ti pandemia.
Ilocos Sur, Umuna a Puesto iti Regional SubayBAYANI Awards
Russell Bragas (FB)
Inreklamo ni Dr. Voltaire L. Seares, medical director ti Dr. Petronillo Seares Sr. Memorial Hospital iti daytoy a probinsia, nga impakat ni Bernos ti saan a nainkalintegan a lockdown iti nasao nga ospital a nangibunga iti pannakataktak ken saan a pannakaipaay ti serbisio kadagiti umili ti Abra.
Idi Sept. 13, pinatgan ti maysa a korte iti daytoy a probinsia ti petision ni Bernos para iti Temporary Restraining Order (TRO) a nagpaso idi Sept. 23 kontra iti suspension.
Sagudayen ti pinal ken executory order ti Office of the President idi Sept. 23 babaen ti Deputy Executive Secretary for Legal Affairs (DESLA) ti Office of the Executive Secretary Anna Liza G. Logan a napaay ni Bernos a nangipila iti motion for reconsideration iti pannakasuspensona iti sango ti OP.
Inkeddengna, babaen ti turay ni Executive Secretary Lucas Bersamin, a saan nga inapela ni Bernos ti pannakasuspendena iti sango ti Court of Appeals (CA) nga isu ti umno a lugar para kadagiti apela maipapan kadagiti administratibo a sanction nga ituyang ti OP.
“Ipatungpalmo dagiti bileg ken aramidem dagiti trabaho ti bise gobernador a kas ibilin ti linteg a maibatay kadagiti maipakat a linteg, pagannurotan, ken regulasion,” imbilin ni Remulla ken ni Bragas. (Freddie Lazaro/ Manila Bulletin)
