ILOILO CITY – Napili ti Iloilo Esplanade, river park project iti daytoy a siudad, a maysa kadagiti nangabak iti 2024 Asian Townscape Awards (ATA).
Nabigbig ti Iloilo Esplanade a kas maysa kadagiti kangrunaan a modelo para iti urban landscape construction iti Asia bayat ti awarding ceremony a naangay idiay Fukuoka, Japan idi kalman, Lunes, Nob. 18.
Inted ti ATA ti pammadayaw iti Iloilo Esplanade gapu iti “komprehensibo nga inisiatibo a nairanta a mangtaming iti polusion ken pannakadadael ti aglawlaw ti Karayan Iloilo a gapuanan dagiti saan a maikanatad nga aktibidad ti tao bayat nga itandudona ti sustainable development.”
Ti Iloilo Esplanade iti Iloilo City. (Tara Yap)
Farm specialist iti Abra, napaltogan
Ti linear river park ket dati a paset ti Iloilo River Development Master Plan a nainaw idi 2000.
Naipatungpal ti pudpudno a rehabilitasion ti Karayan Iloilo ken ti kabangibangna a Karayan Batiano nangrugi idi 2011 kalpasan ti panangbukel ni Sen. Franklin M. Drilon, maysa nga Ilonggo, iti public-private partnership (PPP).
Dinisenio ni nalatak nga Arkitekto Paulo Alcazaren, naikonektar ti parke ti karayan kadagiti naaramid a bike lane ditoy.
Ita, daytoy a parke iti igid ti karayan, ar-aramaten dagiti umili a naayat nga ag-jogging, ag-skateboard, agwatwat, agpagnapagna, wenno agbanniit a kas paglinglingayan.
“Agyamankami ta napili ti esplanade-mi, ken patienmi a pudno a maikari daytoy a proyekto iti pannakabigbig a naibatay kadagiti pagalagadan a naipamaysa iti panangparnuay kadagiti natalged nga espasio iti siudad bayat ti panangyam-ammo kadagiti baro a rupa ti panagdur-as ti siudad,” kinuna ni Iloilo City Planning and Development Officer Ronald Cartagena, a nangawat iti pammadayaw idiay Japan. (Tara Yap/ Manila Bulletin)
