DITOY Cagayan ken dadduma nga ili ti Isabela nga asideg iti Tuguegaro City, adu pay laeng dagiti agdengdengngeg iti radio no kasta nga agpalpadan wenno agin-inanadan a naggapu kadagiti taltalonda. Malaksid kadagiti damdamag, adu latta met ti mailiw a dumngeg kadagiti kanta nga Ilokano a maipatpatangatang babaen ti radio aglalo kadagiti lugar a nakapsut ti signal ti internet.
Saan ngarud a nakakaskasdaaw no apay a nagtalinaed ti kinalatak ti agtallon a dekada a programa iti radio nga “Ilokanong Koboy” iti DWPE Radyo Pilipinas 729 KHz AM Station a nangrugi idi arinunos ti dekada nobenta.
No labsen ngarud ti agsao, saanka a Cagayano no dimo am-ammo ni Ilokanong Koboy, ti nataraki ti bosesna ken nasarangsang ti katawana nga anawnser iti nasao nga estasion ti radio.
Iti programana nga “Ilokanong Koboy,” ipatpatayabna dagiti kanta nga Ilokano bayat ti panangbasbasana kadagiti kablaaw nga ipatpatulod dagiti agdengdengngeg kenkuana. Ngem ti kangrunaan a paset ti programana, isu ti panagibasana kadagiti daniw a maipatpatulod met laeng kenkuana—babaen ti koreo idi awan pay ti selpon ken internet; itan, babaen ti Messenger wenno mensahe iti Facebook Page-na.
BROADCAST MEDIA: Ti Drama iti Biag da Gusting ken Sofing
Wen, gapu ti internet ken social media, mabuya metten ti nasao a programan iti Facebook isu a makitan ti kinaragsak ni Ilokanong Koboy nga agkatawa ken agpakatawa. Saan laengen nga iti probinsia ti Cagayan ken Isabela ti pakadanonan ti ‘kabaliona.’ Dumanon payen iti nadumaduma a paset ti lubong a yan dagiti Ilokano a mangay-ayat kadagiti samiweng ken daniw nga Ilokano.
Kabayatan a masursurat daytoy, addaanen iti 26,000 followers ti Facebook Page-na nga Ilokanong Koboy v.2. Saan met a nakurkurang ngem 1,000 views, 100 likes, ken 10 shares ti tunggal livestream-na iti Facebook.
Asino ngamin ni Ilokanong Koboy?
Isu ni Noel Dizor Estrella ti Baggao, Cagayan. Nagpaay a General Radio Communication Operator iti dua tawen ken Broadcast Operation Technician III iti DWPE Radyo Pilipinas 729 KHz AM Station manipud 1986 agingga iti agdama. Paset ti Philippine Broadcasting Service (PBS), Bureau of Broadcast Services a masarakan iti Cagayan State University (CSU) Carig Campus, Tuguegarao City, Cagayan ti Ti DWPE Radyo Pilipinas 729 KHz. Technician ti talaga a trabahona ngem naipaayan iti break nga agbalin nga anawnser gapu iti napintas a bosesna ken nasarangsang a katawana. Ket dina ninamnama nga agbayag ti programana nga “Ilokanong Koboy” iti agarup tallon a dekada.
Addaanda ken sigud a Lenie Conciso iti dua nga annak a lallaki—da Paul Ryan ken Franz Allen.
Maipatpatangatang ti programa nga Ilokanong Koboy ken mabuya iti Facebook Page nga Ilokanong Koboy v.2 (https://www.facebook.com/Ilokanongkoboyofficial) manipud Lunes agingga iti Biernes iti alas sais iti malem agingga iti alas siete iti rabii.
Malaksid iti “Ilokanong Koboy,” iturturong pay ni Apo Estrella ti programa a napauluan “Linabag ti Napalabas” iti alas otso agingga iti alas nuebe tunggal agsapa ti Domingo. Iti daytoy a programa, dagiti met pakasaritaan ti biag a maipatpatulod kenkuana ti ibasbasana.—O
(Bannawag, Mayo 1-15, 2024)
