Kas agtultuloy a panangitandudo iti industria ti kape iti Ilocos Sur, angayen ti Gobierno Probinsial ti Ilocos Sur Coffee Festival 2024 manipud Nobiembre 25-29, 2024.
Naawagan iti Kape at Kultura, maangay ti opening ceremony ti Coffee Fair iti umuna nga aldaw, a pakairamanan ti pannakaisayangkat ti agduduma a kompetision kas iti Booth Design Competition, ken Coffee Painting (Student and Open Category).
Maaramid met iti maikadua nga aldaw ti Husay at Galing a pakaangayan ti nadumaduma a pasalip iti green grading wenno panamaglalasin (sorting) iti bukel ti kape a pagsasalisalan kadagiti mannalon iti kape, ken pasalip iti panagtempla iti mainum a kape a pakairamanan ti specialty drink, brewing throwdown ken latte art para kadagiti barista.
Naawagan met iti Tasa at Aroma ti maikatlo nga aldaw a pakaangayan ti panagsanay iti panagraman ken panagangot iti aroma iti kape (coffee cupping).
Cauplasan Bridge iti Ilocos Norte, agtalinaed a nakaserra agingga iti Enero 2025
Iti maikapat nga aldaw, maangay ti Usapang Kape, maysa a forum a napauluan iti “Repurposing of Coffee Ground” a pakayadalan ti nadumaduma a pakausaran ti naggilingan ken nagpespesan (coffee ground) tapno maaddaan pay daytoy iti usar kas iti panabalin daytoy a body scrub ken ganagan.
Maipaay met iti maudi nga aldaw ti Paggawad a pakayawatan ti premio dagiti nangabak iti agduduma a salip. Mayawat pay ti insentibo a kuarta para kadagiti mannalon iti kape a simmali iti Philippine Coffee Quality Competition 2024. (Mancielito S. Tacadena)
