“KADUAENDAKAMINTO kadi a mangitulnog ken ni nanang inton bigat,” inyunay-unay ni Grace de la Cruz, kinaklaseanmi iti hayskul, idi agpakadakamin a napan nakiminatay iti nanangna.
Uray dina imbaga dayta, sigurado a mapankami. Gagangayen dayta ta nakairuamantayon ti sumaranay. Ngem ti gagangay a pannakiandingay, nanayon iti regget idi ikissiim kaniak ni Samson Barangan a kaarrubada: “Dakkel ti kapado a nuang a partienda.”
No apay, kellaat ngamin a simken iti lagipko ti maysa a buya idi ubbingkami pay: ittip ti innapuy iti nakalutuanna a sinublan, nabuyatan iti digo ti sangkutsar a nuang, sa kidkiden a kanen dagiti lallakay nga aglutluto ken dagiti makimitir. Ikkandakami met nga umarak nga ubbing. Nagimasen!
Ti sangkutsar ni Joel. (Rinetrato ti autor.)
BROADCAST MEDIA: Asino ni Shalimar?
Inkeddengko ngarud a sapaek ti mapan makipamumpon ta bareng makaramanak manen iti ittip a naupran iti digo ti sangkutsar.
Kadagiti away, sigurado a bunaren ti padaya no agdinamag a nagparti iti nuang ti agpasken. Kunada ngarud a no agpartika iti saraan, agtangguyob nga agayab iti tao. Isu a nariwet pay laeng, addan dagiti umar-arubayan iti naikuban a paglutuan ta bareng makaramanda iti kilawen wenno kappukan.
Kiwkiwarenen ni Joel Simon, ti maestro kosinero a taga-Sitio Dicaoa iti Barangay Loing, Piddig, Ilocos Norte, ti maysa kadagiti tallo a sinublan a paglutlutuanna iti sangkutsar idi dumtengak. Isasaang pay laeng dagiti kakaduana ti apuyenda iti sabali a sinublan. Sayang, diak makaraman iti nadiguan nga ittip.
Dinamagko ken ni Joel no apay a tallo ti sinublan a naglutuanda iti sangkutsar. Impalawagna a gagangay a templa ti umuna a sinublan, nalaokan iti papait ti maysa, idinto a nalaokan iti dara ti maysa. Adda ngamin dagiti di mangayat iti adda papaitna, kasta met iti adda laokna a dara.
Kilawen, kaliente ken igado dagiti dadduma pay a luto ti karne ti nuang. Dagitoy a luto ti kadawyan a mairaman a maidasar kadagiti lamisaan a nairanta kadagiti espesial a bisita, nangruna kadagiti padaya iti kasar ken pabunar. Manmano a mairaman a maidasar ti sangkutsar iti presidential table ken lamisaan. Ngem adda ketdi dagiti sangaili a mangsapul iti sangkutsar. Masansan a maisursor ti nakatimba a sangkutsar kadagiti gagangay a makidaya a saan nga “aglamisaan.”
Kiwkiwaren ni Joel Simon ti lutlutuenna a sangasinublan a sangkutsar. (Rinetrato ti autor.)
Nasabor, nananam, makapnek. Uray la a darugsoyenka iti ling-et no agkaldoka. Dagitoy ti masansan a sawen dagiti manggusto iti sangkutsar a nuang isu a kaykayatda pay ti di aglamisaan no makidayada.
Ania dagiti paset ti nuang a maluto a sangkutsar ken kasano ti pannakalutona?
Lasag, kudil, bara, bagbagis, dalem, puso ken dara, impalawag ni Joel.
Kalpasan a mabugguan a naimbag, ilamaw dagiti napili a parte ti nuang, agraman tultulang. Isina nga ilamaw dagiti bagbagis tapno di maalian iti pait dagiti dadduma a parte. Kalpasan a malamaw, alas-asen ken iwaen dagiti lasag, kudil, dalem, puso ken bagbagis; tadtaden ti bara. Isubli nga ipisok dagiti naiwa ken natadtad a parte iti naglamawan. Inayon ti natadtad a laya ken sibuyas a naigisar iti sabali a pariok wenno siliasi. Templaen iti asin ken suka. Lutuen iti lima nga oras (wenno agingga iti lumukneng). Alay-ayan ti sungrod kalpasanna sa masungrodan manen iti maysa nga oras sakbay ti panangidasar.
Simple a luto ngem sigurado a pumanerper ti panagigup no maidasar ti sangkutsar a nuang iti pagdadayaan. Ket kunam pay, mabalin a pagilig-isan ti tian kalpasan ti pannangan.–O
(Adda kadi met maipadamagyo nga imasenyo a masida/makan/mainum iti napananyo a panganan a mabalinyo nga irekomendar a padasen met a ramanan dagiti naimas ti kakaananna a readers ti Bannawag? Ipatulod iti daytoy baro a seksion a “Nagimasen, Abalayan!” iti: [email protected]. –Editor)
(Bannawag, Nobiembre 16-30, 2024)
