Mabalin nga agpeggad a makissayan wenno bumaba ti cash remittances wenno patulod a kuarta iti Filipinas, a napateg unay ekonomia ti pagilian, gapu iti naing-inget a pannakakontrol ti imigrasion ken panangkamat kadagiti ilegal a migrante iti Estados Unidos iti babaen ti administrasion ni kabbotos a presidente Donald J. Trump.
Segun daytoy iti report ti Capital Economics, maysa a London-based think tank, a nangibunannag nga apektaran ti protectionist nga administrasion ni Trump dagiti ekonomia nga agdepdependar iti remittances, a pakairamanan ti Filipinas.
Kinuna ti Capital Economics nga "adu a migrante nga agnanaed ken agtrabtrabaho iti US ti agirem-remit iti kuarta kadagiti pagilianda. Malaksid iti epekto iti remittances dagiti panangatipa iti migrasion ken posible a deportasion, agsagaba pay ti remittances no ipatungpal ti administrasion ni Trump ti singasing ni kabbotos a bise presidente JD Vance a mangituding iti buis iti remittances."
Immpalgak ni Philippine Ambassador iti US Jose Manuel G. Romualdez nga umabot iti 300,000 nga ilegal a Filipino nga imigrante ti adda iti Amerika. Indagadagna kadagitoy nga agawiddan iti Filipinas sakbay a maipatungpal ti plano ni Trump a mass deportation.
Makaammon ni Apo Dios,” kinuna Sen. Imee Marcos iti komento ni BP Duterte iti pannakaisubli ni tatangna iti Filipinas
Segun iti datos ti US Census Bureau idi 2022, umabot iti 4.1 a milion a Filipino-American ti agnanaed iti Amerika.
Iti met kaudian a datos ti Bangko Sentral ng Pilipinas (BSP), manipud Enero agingga iti Septiembre ita a tawen, ti US ti pagtaudan ti 41.3 a porsiento iti dagup a remittances--cash a nai-remit babaen dagiti banko, agraman dagiti personal a naipatulod a kuarta kadagiti kakabagian.
Iti report ti BSP kadagiti remittance manipud kadagiti adda iti ballasiw-taaw a Filipino, ti US ti numero uno a pagilian a pagtaudan wenno paggapuan ti patulod a kuarta gapu iti gagangay nga aramid dagiti remittance center a panangiturong iti money transfers babaen dagiti US-based correspondent banks. (Ben Arnold de Vera/MB)
