Kalpasan ti 16 a bagyo a limmabasen iti Filipinas itoy a tawen, kinuna ti Philippine Atmospheric, Geophysical and Astronomical Services Administration (PAGASA) a maysa wenno dua pay a tropical cyclone ti mabalin a mabukel wenno sumrek iti Philippine area of responsibility (PAR) sakbay nga aggibus ti 2024.
Segun iti listaan ti PAGASA kadagiti nagan ti tropical cyclone, Querubin ken Romina ti nagan dagiti sumaruno a dua a bagyo.
Iti maysa a climate forum ita a Mierkoles, Nobiembre 20, inlawlawag ni PAGASA Weather Specialist Joanne Mae Adelino ti lima a gagangay a dalan ti tropical cyclone iti ikub ti PAR iti bulan ti Disiembre.
Impaganetget ni Adelino a dagiti bagyo iti maudi a kakapat ti tawen ket kaaduanna nga ag-landfall, lumasat iti pagilian, ken pumigsa.
Listaan dagiti nakapasa iti 2024 Philippine Bar Examination
Umuna, mabalin a mabukel ti bagyo iti akindaya a Pasipiko, sumrek iti PAR, agbuelta nga agturong iti daya a paset ti PAR a di ag-lanfall, sa agturong iti Japan.
Maikadua, mabalin a sumrek ti bagyo iti PAR, agbuelta sakbay a makapag-landfall, agturong iti amianan a daya a paset ti PAR sakbay nga agturong iti Japan.
Maikatlo, mabalin nga ag-landfall ti bagyo iti Amianan wenno Tengnga a Luzon, sa kalpasan a makaruar iti landmass, agpalaud nga agturong iti Hong Kong.
Maikapat, mabalin nga ag-landfall ti bagyo iti Abagatan a Luzon wenno Amianan a Visayas, sa agpalaud nga agturong iti Vietnam.
Maikalima, mabalin nga ag-landfall ti bagyo iti Abagatann a Visayas wenno Amianan a Mindanao sa agpalaud nga agturong iti Thailand.
Kinuna ni Adelino a maibasar iti tropical cyclone threat potential forecast ti PAGASA inton Nobiembre 20 agingga iti Disiembre 3, ti pannakabukel ti tropical cyclone ket "mabalin a saan" nga iti Week 1 ngem “mabalin” nga iti Week 2, gapu iti “low to moderate” probability ti umarngi iti tropical cyclone nga alinuno wenno sirkulasion a mangbukel iti tropikal a bagyo. (Ellalyn De Vera-Ruiz/MB)
