RAMON, Isabela – Dua a tin-edier nga estudiante ti natay ken nasugatan ti kaduada iti pannakidinnungpar ti naglugananda a motorsiklo iti maysa nga Sports Utility Vehicle iti Barangay Oscariz itoy nga ili idi rabii ti Nobiembre 20, Mierkoles.
Kinuna ti Police Regional Office-2 nga agturong dagiti babbai a biktima iti maysa iti milk tea shop idi napasamak ti aksidente. Agpakanigid koman ti motorsikloda idi nadungpar ti napartak ti tarayna nga SUV, kinuna ti polisia.
Nasugatan ti drayber ti SUV ken dagiti nakamotorsiklo.
Naitaray dagiti biktima iti ospital a nakaideklararan a natayen ti dua kadagitoy.
Mangnamnama ni Marcos iti pannakaisubli ti panangipateg ni Pinoy iti arte a Filipino
Taga-Ifugao dagiti nakamotorsiklo – dua nga agtawen iti 14 ken maysa nga agtawen iti 19.
Kinuna ti polisia a maysa kadagiti biktima ti nangibaga ken ni nanangna a rummuar daytoy tapno gumatang iti milk tea.
Naipan met ti drayber ti SUV iti Ramon police station tapno maimbestigar ken tapno maaramid ti umno nga addang mainaig iti aksidente. (Liezle Basa Iñigo/ Manila Bulletin)
