INKAKAUBINGAN ni Randulph Madera ti arapaapna a makapagtrabahonto met iti radio.
Ngem gapu ta awan met kurso a Mass Communication wenno Broadcast Journalism iti kolehio a nagbasaanna, nangala iti Edukasion, ta kas kunana, kas mannursuro, awan met pakaidumaanna kadagiti agtrabtrabaho iti radio a mangidandanon kadagiti baro nga impormasion, ken mangilawlawag kadagiti naririkut nga isyu a pakaseknan ti amin.
Dua a tawen a nagisuro ni Randulph iti maysa a pribado nga eskuela elementaria (2015-2017). Ngem gapu iti parikut iti pagbiag, napanunotna ti nag-OFW iti Saudi Arabia. Nagtrabaho iti maysa a panganan.
Ngem di nagbayag, nagawid iti Filipinas ta di mapukaw iti panunotna ti panangibinglayna koma met ti ammona, saanen nga iti eskuela, no di ket iti radio, ta dina met mabalin ti agsaosao iti trabahona iti Saudi Arabia. Ket iti maysa nga aldaw, inangayna amin a turedna ket indatagna ti bagina iti DZSO Bombo Radyo La Union. Naparaburan iti napintas a timek, naikkan iti gundaway nga agbalin a reporter.
BROADCAST MEDIA: Asino ni Shalimar?
“Pudno, masapul laeng ti tured no kayat a gun-oden ti arapaap,” kinunana ta akuenna, awan am-ammona iti radio a mabalinna a pagpatulongan. Manipud dita, in-inut a naam-ammo ti naganna iti radio. Ita, ni Randulph, iti tawenna a 32, ti maysa kadagiti kalalatakan iti radio iti La Union. Napadasanna payen ti nag-OIC iti radio station a pagpapaayanna.
Iti agdama, innem ti iggem ni RM (awag dagiti kasingedna kenkuana) a programa iti Bombo DZSO Radio: Bombo Reports Second Morning Edition, Bombo Hanay Pangngaldaw, Bombo Reports 3, Duralex Sedlex, Bombo Harana, Arasaas ti Rabii, ken Bombo Zona Libre.
Kas anchor ti Bombo Reports Second Morning Edition, idanon ni RM dagiti ‘kappuros’ a nakalapna a damag. Ibuksilanna metten dagitoy a paspasamak. Kas kunana, parbangon ken rabii ti kasayaatan a panagukkonna iti damag nga idasarna kadagiti programana.
Iti Bombo Hanay Pangngaldaw, idanonna dagiti kabaruan ken hot issues a damdamag lokal, nasional ken internasional. Ditoy, komentarioanna ti aramid dagiti adda iti poder, positibo man wenno negatibo, “nga awanan panagbuteng ta daytoy ti maysa kadagiti akemko a kas anchorman.”
Dinominggo met dagiti programana a Duralex Sedlex, ti Bombo Harana, ken ti Arasaas ti Rabii.
Makireliebo pay kadagiti padana nga anaunser iti Good Morning Philippines.
“Ti broadcaster, nasken nga agbatay laeng iti kinapudno; awan lugar kenkuana ti fake news,” kinunana idi masaludsod kenkuana dagiti maiparbeng a galad ti maysa a brodkaster.
Kas kuna ni Direktor Jennilyne Role ti Philippine Information Agency (PIA) ti Ilocos Region a nakabase iti Siudad ti San Fernando, La Union, maibilang ni RM kadagiti mapagtalkan a brodkaster iti La Union,
Agnaed ita ni RM ken ti pamiliana—ni Marivic Rodriguez Lomboy nga asawana ken ni Luke Hebrew Madera nga anakda—iti Brgy. Sta. Cruz, Bacnotan, La Union.—O
(Agpapaay ni F.C. Casil nga Editor-in-Chief ti aglinawas a periodiko nga “Amianan Tribune” ti La Union; agpapaay met ni Alex Dumas iti Dili Agricultural Multi-Purpose Cooperative, Bauang, La Union.)
(Bannawag, Hunio 1-15, 2024)
