NO madanonanen ti nasapa a paset ti malem, di nakakaskasdaaw no adun nga agdengdengngeg iti radio iti Kailokuan ti nangbaliw iti “pusiposan” ti radioda tapno agdengngegda iti nalatak a programa iti radio a “Lagip ti Napalabas” ti DCJC, Aksyon Radio, iti Siudad ti Laoag.
“Dear Manong Nemy…” dayta ti pangirugi iti pannakaibasa ti surat ti napili a letter sender. Ket ti host: awan sabali no di ni Manong Nemy, ti nalatak met nga awagda ken ni Nemesio Arizabal Ruiz Sr. – nga idi pay 1980s, agal-allangoganen iti tangatang ti “makaabbukay-rikna” a bosesna a kas kuna dagiti adu a dumdumngeg kenkuana.
Pudno a nabayagen nga agar-ari iti tangatang ti nagan ni Manong Nemy. Nangrugi a kas agsursurat iti drama iti radio. Adu pay laeng ti makalagip kadagiti drama a sinuratna idi nasapa a paset ti 1980s a kas iti “Crisanto Sagrado” ken “Tiagong Cobra” a naipatangatang iti dati a DWLW. Kadagita met laeng a panawen a rinugianna ti programa a panagibasa iti surat a napauluan iti “Malagipmo Pay Ngata?” ken panawen a kaaktibona nga agsurat kadagiti sarita ken salaysay iti Bannawag.
Malaksid iti panagsursuratna iti drama, nagpaay pay a direktor ken dramatista. Nabigbig iti laingna a mangbaliw iti timekna agbatay iti agbibiag iti drama.
BROADCAST MEDIA: Asino ni Shalimar?
Idi immakar ni Manong Nemy iti DWRI, ditoy met a naglatak ti letter reading a programana a “Love Letters.”
Idi 1992, nabotosan a konsehal ti Laoag City ket nagtakem iti tallo a tawen. Kalpasanna, nagsubli iti radio (iti DZJC) a kas host ti “Lagip ti Napalabas.” Nagsurat ken nagakem pay kadagiti drama, ken ditoy a naglatak dagiti insuratna a drama a kas iti “Angelo Uraro,” “Bastardo,” “Bobs Diangga,” “Hello Love,” ken dadduma pay. Napili ti “Hello Love” a Best Provincial Radio Drama iti entero a Filipinas idi 1997 a nakaipaayan kenkuana ti KBP Golden Dove Award.
Nagretiro ni Manong Nemy iti DZJC idi 2004. Napukaw ti naganna iti radio iti lima a tawen. Ngem idi 2009, innala ti Bombo Radio Laoag a nang-host iti letter reading a programa a “Kahapon Lamang.” Nagpaut ditoy iti 12 a tawen. Naginana manen iti makatawen ngem idi 2017, napanunotna ti mangaramid iti bukodna nga studio a pakabuyaan kenkuana iti Facebook kadagiti programana a “Dear Manong Nemy” ken “Idi Kalman Laeng.”
Ngem napigsa ti awis ti radio ket idi Abril 11, 2022, nagsubli ni Manong Nemy iti DZJC tapno agpaay manen a host ti “Lagip ti Napalabas.” Kas iti dati, adu dagiti listener ni Manong Nemy. Kas kunadan, “no sadino ti yan ti Manong Nemy, isu ti pagdengganmi.”
Ad-addan nga immadu ti agdengdengngeg iti “Lagip ti Napalabas” idi nairugi idi Enero 2023 ti “Reynaldo ‘Rey’ Fiesta Sentensiador Award, Search for a Million-Dollar True to Life Success Story” iti panangisponsor ni Rey Fiesta nga agindegen iti Hawaii. Kas ken ni Manong Nemy, mannurat iti drama iti radio ken nagsursurat iti sarita iti Bannawag ni Rey Fiesta. Nalatak ti sinuratna a drama a napauluan iti “Sentensiador” iti DZJC sakbay a nagpa-Hawaii.
Iti 1st Sentensiador Award a naipaay idi Disiembre itoy a tawen, napadayawan a kas grand prize winner ni mannurat ti Bannawag Norberto D. Bumanglag Jr. ti San Nicolas, Ilocos Norte (PhP50,000); agpada met a runners-up da Berlina Fagaragan ti Badoc, Ilocos Norte (PhP5,000) ken Pompeyo Saludares ti Dingras (PhP5,000).
Manamnama nga agtultuloy ti kinalatak ti “Lagip ti Napalabas” gapu iti kinapintas dagiti surat a maipatpatulod iti programa—ken gapu iti laing ni Manong Nemy a mangibasa kadagitoy: napnuan emosion wenno makaabbukay-rikna a kas kuna dagiti agdengdengngeg iti daytoy a programa.–O
(Bannawag, Abril 1-15, 2024)
