MAYSA kadagiti paggugusto dagiti radio listeners iti Ilocos Sur ti "Oh! Yes Spalatoting" a programa ti Radio Station a DWRS Commando Radio iti Siudad ti Vigan. Mangngegan daytoy manipud iti alas onse iti bigat agingga iti ala una ti malem nga oras ti pangngaldaw ken rugi ti siesta, ngem kadagiti avid listeners ti programa iragpinda ti dumngeg iti makaparegta a boses ti radio announcer bayat ti panangimasda iti inabraw a pangaldawda ken bayat ti panagpalpada.
Simple laeng met ti format ti programa: agkantada a live, kumablaaw, agipadamag. Ngem ti pakaawisan dagiti agdengdengngeg, isu dagiti ang-angaw (jokes) nga ipatpatayab ti host.
Nangrugi daytoy a programa iti radio idi pay agtengnga ti dekada nobenta ngem kasla di kauma dagiti agdengdengngeg. Itay nabiit, nakaumanmi ni Commando Kuatro Peter Rebunal, ti orihinal a host ti nasao a programa, no kasano met a napampanunotna ti kastoy a programa.
Segun ken ni Apo Peter, napanunotna ti kastoy a programa a kasla variety show tapno adda met maidiayada a baro kadagiti listeners. Tawen 1990 idi agbalin isuna a reporter ti DWRS Commando Radio. Pasaray isu ti mangtugaw iti sumagmamano a programa ti estasion no kasdiay a mairana nga adda iti field wenno nanglangan ti anchorman. Nadlaw dagiti kakaduana iti estasion a pagaayat dagiti dumdumngeg ti estilona ta maray-awda iti naganaygay a bosesna ken iti panangisapitna iti ang-angaw. Kinapatang ngarud ti manager a mangaramid iti bukodna a programa. Ditan a naipasngay ti Oh! Yes Spalatoting.
BROADCAST MEDIA: Asino ni Shalimar?
Ngem ania ti kayat a sawen ti spalatoting? Kuna ni Apo Peter nga “uray ania wenno everything.” Kas koma kano no adda dua a babbai nga agin-innarasaas, mabalinmo a kuna a, “Ne, agis-ispalatotingkayo manen (tsismis).” No adda makitam a lalaki nga adda kaduana a babai a saan met a ni baketna, “Ne, kadua ni Angkuan ti spalatotingna (kulasisi).” No adda met babai a sarsarunuen ti adu nga ubbing, mabalin kano met a kunaen a, “Ne, dagitoy met ngatan dagiti spalatotingmo (annakmo).”
Iti ababa a pannao, mabalin amin iti programana. Ket gapu ta addaan met ni Apo Peter iti napintas a boses, live a kumanta iti programa kalpasan ti pangablaaw, angaw ken dadduma pay a mapanunotna nga aramiden iti tunggal episode. Ditoy, in-inut a naam-ammo ni Commando Kuatro. Agingga nga arigna isunan ti “Joey De Leon” ti radio iti Ilocos Sur gapu iti laingna a mangyablat kadagiti pakpakatawana. Natural kenkuana ti kinamanagpakatawana. Lalo ket malaksid iti natural a bosesna, matuladna pay ti boses ti kumkumbet a lakay ken kagargarawanna nga ubing. Di ngarud nakakaskasdaaw no isu ti mabigbig a numero uno a komediante iti radio iti Ilocos Sur.
Adda dagiti gundaway nga agdamag dagiti dumdumngeg no kasano ti itsura ni Peter Rebunal. Isungbatna met nga umasping iti maysa nga artista a tsinito ken nabaneg nupay napugpugot laeng. No agdamag manen ti listener no asino dayta nga artista a karuprupana, ibagana a ni Bong Revilla Jr.
Idi agangay, napanunotna ti mangala iti co-host tapno nalaklaka ti agibato iti jokes. Innalana a kadua ni Commando Nuebe Tet Garrido. Nagbalin a medio seksi ti programa gapu iti makagargari a katawa ti babai a co-host—a lalo pay a nakaguyugoy iti adu a listeners. Kalpasan a naglusulos ni Tet iti DWRS, sinolo manen ni Apo Peter ti programa, agingga a simmublat a nagbalin a co-host ni Commando Otso Rexson Peneyra. Kas ken ni Commando Kuatro, nalaing nga agyibbet iti jokes ken kumanta ni Rexson a maysa pay a sarsuelista. Kas iti immuna a tandem, nag-click daytoy kadagiti dumdumngeg.
Idi saan pay nga uso ti live stream iti Facebook, i-text dagiti listeners dagiti pangablaaw a mensaheda, a basaen met dagiti host ti programa. Pasaray kantaenda dagiti kansion a kiddaw dagiti dumdumngeg. Idi agangay, nainayonen a maibasa iti programa dagiti mapilida a pakpakatawa nga ipatulod dagiti dumdumngeg. Banag a lalo pay a namagbalin iti Oh! Yes Spalatoting nga interactive radio program. Ita ta ad-adun ti agus-usar iti social media, dagiti komento iti FB live ti programa ti ibasbasada.
Iti panagbakasionna iti trabaho iti radio ni Commando Kuatro idi Enero itoy a tawen, simmublat a kas main host ni Rexson Peneyra. Adda metten dagiti baro a kakaduada iti estasion a sansanayen ni Rexson nga agbalin a co-host tapno ituloyda ti mangray-aw kadagiti Ilokano a dumdumngeg iti programa nga Oh! Yes Spalatoting.
Tubo ti Siudad ti Vigan ni Apo Peter. Addaanda iti maysa a bunga iti kaingungotna, ni dati a Shirley Tabunda ti Pinili, Ilocos Norte, maysa a maestra iti elementaria.
Tubo met ti San Juan, Ilocos Sur, ni Rexson Peney. Nagturpos iti Bachelor of Secondary Education iti University of Northern Philippines, Vigan City idi 2006. Nangrugi met kas field reporter ti DWRS Commando Radyo idi 2011 ken isu ti agdama a News Director ti nadakamat nga estasion. Addan metten maysa a bungada ken baketna a ni Gennina. –O
(Bannawag, Mayo 16-31, 2024)
