KADAGITI agdengdengngeg iti radio iti probinsia ti Abra, saanak la ketdi nga agbiddut no kunak a maysa kadagiti paboritoda a timek iti tangatang ni Shalimar.
Am-ammo ni Shalimar a kas DJ iti DWWM 96.9 Spirit FM ken kas Patrol 12 iti DZPA CMN Puso ti Abra, dua nga estasion ti radio a kukua ti Christian Ministries Network.
Naipasngay a kas Elaine Ferras idi Disiembre 5, 1979, isu ti maikadua iti tallo a bunga da Emmanuel Bersalona Ferras ken dati a Lucena Uringan manipud iti tribu nga Adasen iti Poblacion, Agsimao, Tineg. Inaunaan a kabsatna ni Ndaniel, buridekda ni Maria Ritchelle. Ti ili a Tineg ti maysa kadagiti kasulinekan nga ili ti Abra, a kas inladawan ni Elaine nga idi ubing pay, “lugar a di unay al-allukoyen ti adu a nagannak dagiti annakda a mapan iti eskuela, saan a gapu ta awan ti arapaapda ngem gapu ta awan ti usarenda nga agbasa ken awan pagnaedanda iti kabesera a pagbasaanda koma iti kolehio ket ngarud kapilitan nga aggastoda iti balonda a mapan agbasa, makan, bayad ti pagkaseraan malaksid ti bayadan iti pagadalan.”
Ngem pagyamanan ni Elaine ta iti pamiliada, saanda a pinagbalin ti kinakurapay a rason tapno dida makaadal.
BROADCAST MEDIA: Ania, Nakkong, Kayatmo Met ti Agbalin a Brodkaster?
Malaglagip ni Elaine ti lolona a ni Apo Lelis Blace Ferras Sr. a tubo ti La Paz, Abra. Rigat la ti adda iti lolona ngem inkagumaanan daytoy ti nagbasa. Nagsapul iti tao a pagserbianna ken mangpabasa kenkuana agingga a nagturpos iti kinamannursuro. Nangisuro iti Tineg, a nakaikamanganna idi agangay. Nagserbi pay a prinsipal iti nadumaduma a pagadalan iti probinsia. Iti kabassit ti sueldo dagiti mannursuro idi panawenna, inaramidna amin a kabaelanna tapno mapagadalna amin a 9 nga annakna uray pay isamirana ti agtalon. Adda innem a nagbalin nga edukador, maysa ti nurse, maysa ti nagturpos iti komersio, ken maysa ti nagturpos iti inhenieria.
Ngem saan laeng a dagiti annakna ti pinampanunotna. Inrusat ti lolo ni Elaine ti pannakabangon ti Tineg Federated National High School (Tineg National High School). Gapu itoy, umad-adu metten dagiti nakaadal a taga-Tineg ken nagballigi iti tay-ak a pinilida.
Nagturpos ni Elaine iti elementaria iti Tineg Elementary School, iti met Abra High School ti nagturposanna iti sekundaria, sa inleppasna ti AB English/Mass Communication iti University of Northern Philippines (UNP), Vigan City sa nagturong iti Baguio Colleges Foundation para iti sumagmamano a units iti masteral. Nagadal pay iti teknolohia iti STI Baguio. Iti kaaddana idi iti kolehio, nag-OJT iti Radio DZPA ken pasaray met ag-DJ iti Spirit FM.
Kalpasan ti panagturposna iti kolehio, intultuloynan ti nagtrabaho iti Spirit FM ken iti DZPA nangruna iti programa nga “Among ti Gimpong” a rinugian da Nathaniel “Bokyong” Bersamina kaduana ni Emmanuel “Mando” B. Ferras (pimmusayen) nga ama met laeng ni Elaine ken dadduma pay a nagsuksukisok iti pakasaritaan ti Cordillera. Mabalin a ti panagiray ni Elaine iti brodkasting ken panagsurat ket babaen met laeng ti impluensia ti amana ta mannurat idi ti amana iti newsletter a Rangtay ti Cellophil Resources Corporation (CRC) malaksid ti panagpapaayna iti radio.
Sangapulo a tawen nga awan sardayna a nagpaay ni Elaine iti radio ngem idi 2013, pinadasna ti nag-OFW idiay Hong Kong ken idi agangay, idiay London. Nagpaut laeng iti uppat a tawen. Kas kunana, kabayatan ti kaaddana iti ballasiw-taaw, naamirisna nga awan kas iti kaaddana met laeng iti denna dagiti ipatpategna iti biag.
Nagsubli met laeng iti DZPA ket iggemna iti tunggal Sabado, iti tengnga ti aldaw, ti ”Abrenian Express Damdamag” ken ti “Mula sa Puso,” 1-3 PM, iti DWWM Spirit FM. Malaksid iti daytoy, agsursurat pay (malaksid nga isu ti layout artist) iti pagiwarnak ti probinsia nga Abra Today.
Nayasawa ni Elaine ken ni Michael Bilgera Locquiao, maysa a negosiante, ken addaanda iti bugbugtong nga anak, ni Michael “Bitoy” Locquiao II, agad-adal iti Divine Word College of Bangued.
“Kas maysa a kameng ti media, mabalin a diak mapataran ti nagapuanan ti apok a lakay, wenno ni tatangko, ngem ituloyko nga aramaten ti timekko a mangidanon kadagiti tattao kadagiti karbenganda, ken pagrebbenganda a kas umili,” kinunana.—O
(Bannawag, Hunio 16-30, 2024)
